Sucker fish

    (ಬೆಳಗಾ ಮುಂಜಾನೆ ಹಿಂಗೊಂದು ಕನಸು ಬಿದ್ದಿತ್ತು. ಮರೆತು ಹೋಗಬಾರದು ಅಂತ ಈ ಡಾಕ್ಯುಮೆಂಟೇಷನ್)

    Never meet your heroes ಅಂತ ಒಂದು ನಾಣ್ಣುಡಿ ಇದೆ. ಇದು ಸಿನಿಮಾದವರಿಗೆ ಒಪ್ಪೋ ಅಷ್ಟು ಯಾರಿಗೂ ಒಪ್ಪಲ್ಲ. "ಅವ್ರು ಒಂದ್ ಕಾಲ್ದಲ್ಲಿ ಒಳ್ಳೇ ಸಿನಿಮಾ ಮಾಡ್ತಿದ್ರು ಹೌದು. ಆದ್ರೆ ಈಗ ಖಾಲಿ ಡಬ್ಬ" ಅಂತ ಯಾರಾದ್ರೂ ಹೇಳಿದ್ರೆ ರಕ್ತಪಾತ ಆಗೋ ಲೆವೆಲ್ಲಿಗೆ ನೀವೇ ನಿಮ್ಮ ಗೆಳೆಯರ ಹತ್ರ ಜಗಳ ಆಡಿರ್ತೀರಿ. ಅವರ ಜೊತೇನೆ ಕೆಲ್ಸ ಮಾಡೋ ಸಂದರ್ಧ ಬರತ್ತೆ. ಅವಾಗ ಆ ಲೌಡೆ ಅವತ್ತು ಹೇಳಿದ್ದು ನಿಜ ಅಲ್ವಾ ಗುರು. ಹಿಮಾಲಯ ಹತ್ತಿ ಇಳಿದು, ಆಂಡೀಸ್ ಮೌಂಟೆನ್ಸ್‌ನ ಒಳ್ಳೇ ರೋಡ್ ಹಂಪ್ಸ್ ತರ ದಾಟಿ ಬಂದಿರೋ ಈ ಮನುಷ್ಯ ಈಗ ದಾರೀಲಿ ಮನೆ ಕಟ್ಟೋಕೆ ಹಾಕಿರೋ ಜಲ್ಲಿ ಕಲ್ಲು ರಾಶಿ ಹಾಯೋಕೆ ಉಸ್ಸುಬುಸ್ಸು ಅಂತಿದಾನಲ್ಲಪ್ಪ ಅಂತನ್ಸತ್ತೆ. ಈ ಸಂಪತ್ತಿಗಾ ನಾನು ಮನೆಮಠ ಬಿಟ್ಟು ಸಿನಿಮಾ ಮಾಡಕ್ ಬಂದಿದ್ದು ಅನ್ಸತ್ತೆ. ಇದ್ಕಿಂತ ಊರಿಗ್ ವಾಪಸ್ ಹೋಗಿ ಕೂಲಿ ಮಾಡ್ಕೊಂಡಿರೋದೇ ಮೇಲು ಅನ್ಸತ್ತೆ.

    ಹಂಗಂತೀವಿ ಅಷ್ಟೇ. ಸಿನಿಮಾಕ್ಕೆ ಸಿನಿಮಾದವ್ರು ಬಯ್ಯೋ ಅಷ್ಟು ಇನ್ಯಾರೂ ಬಯ್ಯಲ್ಲ. ಹಂಗ್ ಬಯ್ದೋರೆಲ್ಲ ಸಣ್ಣದೋ ದೊಡ್ಡದೋ ಎಂತದೋ ಒಂದು ಕೆಲ್ಸ ಮಾಡ್ಕೊಂಡು ಸಿನಿಮಾಕ್ಕೇ ಆತುಕೊಂಡಿರ್ತಾರೆ. Sucker fish ಅಂತ ಒಂದಿದೆ. ಶಾರ್ಕ್ ಬೆನ್ನ ಮೇಲೆ ಅಂಟಿಕೊಂಡು ಅದು ಹೋದಲ್ಲೆಲ್ಲ ಅದ್ರ ಜೊತೆಗೆ ಹೋಗ್ತಾ ಅದು ತಿಂದಿದ್ರಲ್ಲಿ ಚೂರುಪಾರು ಇದೂ ತಿನ್ತಾ ಹೊಟ್ಟೆ ಹೊರೆಯತ್ತೆ. ಈ ಸಿನಿಮಾ ಶಾರ್ಕ್‌ಗೆ ಜೋತುಕೊಂಡು ಆ ಶಾರ್ಕಿಗೇ ಬಯ್ಕೊಂಡು ಓಡಾಡೋ ಈ Sucker fishಗಳು ಯಾವೂ ಶಾರ್ಕ್‌‍ನ ಬಿಟ್ಟು ಯಾವತ್ತೂ ಹೋಗಲ್ಲ. ಶಾರ್ಕ್ ತಿಂದು ಬಿಟ್ಟಿದ್ರಲ್ಲಿ ಚೂರುಪಾರು ಅಂದ್ರೆ- ನೀವೇ ಫೇಸ್‌ಬುಕ್ಕಲ್ಲಿ ಬಯ್ಯೋ ಪಾರ್ಟಿಗೆ ಎಲೆಕ್ಷನ್ ಟೈಮಲ್ಲಿ ಆಡ್ಸ್ ಬರಿಯೋದು, ಟ್ರಾನ್ಸ್ಲೇಟ್ ಮಾಡೋದು, ಅವ್ರ ಇವ್ರ ಸಿನಿಮಾಕ್ಕೆ ಸಬ್‌ಟೈಟಲ್ ಬರಿಯೋದು, ಫೋಟೋಗ್ರಫಿ ಮಾಡೋದು, ಯಾವ್ದೋ ಆಡಿಯೋ ಕಂಪನಿಗೆ ಭಕ್ತಿಗೀತೆ ವೀಡಿಯೋ ಎಡಿಟ್ ಮಾಡಿಕೊಡೋದು ಇತ್ಯಾದಿ.

    ನಾನೂ ಅದೇ ತರ ಶಾರ್ಕ್‌ಗೆ ಜೋತುಬಿದ್ದಿರೋ ಒಂದು Sucker fish.

    ಈ ಸಲ ನಾಗರ ಪಂಚಮಿಗೆ ಊರಿಗೆ ಹೋದಾಗ ನೆಂಟ್ರೆಲ್ಲ ಅಜ್ಜಿ ಮನೆಯಲ್ಲಿ ಸೇರಿದ್ರು. ಅಲ್ಲೊಬ್ಬಳು ಫಾರಿನ್ ಹುಡುಗಿ ಇದ್ಲು. ಉಮಾ ಥರ್ಮನ್ ತರ ಬ್ಲಾಂಡ್ ಕೂದ್ಲು. ಸ್ಕಾರ್ಲೆಟ್ ಜೋಹಾನ್ಸನ್ ತರ ಕೆಂಪು ಮೈಯಿ. ಹರುಕು ಮುರುಕು ಕನ್ನಡ ಜತೆಗೆ ಇಂಗ್ಲಿಷ್ ಮಾತಾಡ್ಕೊಂಡು ನನ್ನ ಕಸಿನ್ಸ್ ಜತೆಗೆ ಚಕ್ಕಂಬಕ್ಕಲ ಹಾಕ್ಕೊಂಡು ಹೋಳಿಗೆಗೆ ಹೂರಣ ಅರೀತಿದಾಳೆ. ಅಲೇ ಇವ್ಳಾ. ಯಾರ್ ಇವ್ಳು? ಎಲ್ಲಾ ಬಿಟ್ಟು ನಮ್ಮಜ್ಜಿ ಮನೆಯಲ್ಲಿ ಏನ್ ಮಾಡ್ತಿದ್ದಾಳೆ? ನನ್ನ್ ತಂಗಿ ಇಂಫೋಸಿಸ್ ಅಲ್ಲಿ ಕೆಲ್ಸ ಮಾಡ್ತಾಳೆ. ಅವಳ ಕೊಲೀಗ್ ಇರಬಹುದಾ? ನಡುಮನೆಯ ಹೊಸಲ ಹತ್ರ ನಿಂತ್ಕೊಂಡು ಈ ಹೆಂಗಸರ ಮಾತನ್ನ ಕದ್ದು ಸ್ವಲ್ಪ ಹೊತ್ತು ಆಲಿಸಿದೆ. ನನ್ನ್ ತಂಗಿ ಕೊಲೀಗೂ ಅಲ್ಲ? ಯಾರಿರಬಹುದು. ನನ್ನ ಕಸಿನ್ಸ್ ಅವಳಿಗೆ ಪುಟ್ಟಕ್ಕನ ಮಕ್ಕಳು ಸೀರಿಯಲ್ ಬಗ್ಗೆ ಹೇಳ್ತಿದ್ರು. ಅವಳು ಇವರಿಗೆ ಗೇಮ್ ಆಫ್ ಥ್ರೋನ್ಸ್ ನೋಡಿ ಅಂತ ಸಲಹೆ ಕೊಡ್ತಿದ್ಲು. ಅದ್ರಲ್ಲಿರೋ ಸೆಕ್ಸ್ ಸೀನ್ಸ್ ನೋಡಿ ಇವರು ಯಾವ ತರ ಹೌಹಾರಿ ಬಾಯಿ ಬಡಿದುಕೊಳ್ಳಬಹುದು ಅಂತ ನೆನೆಸಿಕೊಂಡು ನನಿಗೆ ನಗು ಬಂತು. ಸ್ವಲ್ಪ ಜೋರಾಗೇ ನಕ್ಕೆ ಅನ್ಸತ್ತೆ. ಎಲ್ಲರೂ ನನ್ನ ಕಡೆ ತಿರುಗಿದರು. ಆ ಹುಡುಗಿಯೂ ನನ್ನ ಕಡೆ ತಿರುಗಿ ನನ್ನ ಕಣ್ಣಲ್ಲೇ ಕಣ್ಣು ನೆಟ್ಟು ನೋಡ್ತಿದ್ದಾಳೆ. ನನಿಗೆ ನಾಚಿಕೆಯಾಗಿ ಸತ್ತು ಹೋದ ನಮ್ಮಜ್ಜನ ಫೋಟೋ ಕಡೆ ನೋಡಿದಂತೆ ಮಾಡಿದೆ. ಬಾ ಇಲ್ಲಿ ಅಂತ ಕರೆದು ಅವಳಿಗೆ ಇವನು ದೊಡ್ಡ ರೈಟರ್‍ರು ಅಂತ ಪರಿಚಯ ಮಾಡಿಕೊಟ್ಟರು. ನನ್ನ ಸಿನಿಮಾ ಫ್ರೆಂಡ್ಸ್ ಇದನ್ನ ಕೇಳಿಸಿಕೊಂಡಿದ್ರೆ ಅದೆಲ್ಲೆಲ್ಲಿಂದ ನಗ್ತಿದ್ರೋ. ಆ ಹುಡುಗಿ ಅವಳೇ ಅರೆದ ಹೂರಣವನ್ನ ಒಂದು ಸಣ್ಣ ಉಂಡೆ ಮಾಡಿ ನನ್ನ ಕೈಗೆ ಕೊಟ್ಟು ಹೆಂಗಿದೆ ಅನ್ನುವಂತೆ ನೋಡಿದಳು. ನಾನು ಬಾಯಿಗಿಟ್ಟುಕೊಂಡು ಚೆನ್ನಾಗಿದೆ ಅನ್ನುವಂತೆ ತಲೆಯಾಡಿಸಿದೆ. ಆ ಹುಡುಗಿ yay ಅಂದಳು.

    ಹಿತ್ತಲ ಕಟ್ಟೆ ಮೇಲೆ ಕೂತ್ಕೊಂಡು ನಾನು ಫೋನ್ ನೋಡ್ತಿದ್ದೆ. Roommates ಗ್ರೂಪಲ್ಲಿ ರೂಂ ಬಾಡಿಗೆಗೆ ಇಷ್ಟು, ರೇಷನ್‌ಗೆ ಇಷ್ಟು, ಕರೆಂಟ್ ಬಿಲ್‌ಗೆ ಇಷ್ಟು, ಸ್ಪಾಟಿಫೈ ಫ್ಯಾಮಿಲಿ ಸಬ್ಸ್‌ಸ್ಕ್ರಿಪ್ಷನ್‌ಗೆ ಇಷ್ಟು ಅಂತ ಲೆಕ್ಕ ಮಾಡಿ ನಿತಿನ ಹಾಕಿದ್ದ. ಹೋದ್ ತಿಂಗ್ಳು ತಾನೆ ಕೊಟ್ಟಿದೀನಿ. ಮತ್ತೆ ಬಂತಲ್ಲ ಈ ಬಾಡಿಗೆ. ಥೂ ಅವ್ನಯ್ಯನ್ ಅಂತ ಬಾಯಲ್ಲಿ ಜೋರಾಗಿ ಬಂತು.

    “What does it mean?” ಅದೇ ಹುಡುಗಿ. ಚಡ್ಡಿಗೆ ಅಂಟಿದ ಹೂರಣವನ್ನ ಒರೆಸಿಕೊಳ್ಳುತ್ತಾ ಹತ್ತಿರ ಬರುತ್ತಿದ್ದಾಳೆ. ನಾನು "ಆಂ?" ಅಂದೆ. Hi, may I know your name? ಅಂತ ಕೇಳಬೇಕಿತ್ತು. ಆದರೆ ಅಷ್ಟು ಮ್ಯಾನರ್ಸ್ ನಂಗೆಲ್ಲಿದೆ.

    “What does Thu avnayyan mean?”

    “Oh. It means something like Fuckin shit”

    “Ah. I see...” ಅವಳ ಚಡ್ಡಿ ಕೊಳೆಯಾದ ನೋಡಿಕೊಳ್ಳುತ್ತಾ “Thu avnayyan.” ಅವಳ ಜೋಕಿಗೆ ಅವಳೇ ನಕ್ಕಳು. ಅವಳು ನಕ್ಕಳು ಅಂತ ನಾನೂ ನಕ್ಕೆ. ನನ್ನ ಪಕ್ಕಕ್ಕೇ ಮೈಗೆ ಮೈ ತಾಗುವಂತೆ ಕೂತಳು. ಬಿಸಿ. ನಿಜ್ವಾಗ್ಲೂ. ಕನ್ಸಾದ್ರೂ ನಿಜ್ವಾಗ್ಲೂ ಬಿಸಿ. ಅವಳೇ ನಾನ್ ಸ್ಟಾಪ್ ಮಾತಾಡುತ್ತಾ ಹೋದಳು.

    ಅವಳು ಭಾರತಕ್ಕೆ ಬಂದಿದ್ದು ಕೆಲಸಕ್ಕೂ ಅಲ್ಲ ಪ್ರವಾಸಕ್ಕೂ ಅಲ್ಲ. ಎತ್ಲಾಗಾದ್ರೂ ಓಡೋಗ್ಬಿಡಣ ಅಂತಾರಲ್ಲ ಹಂಗ್ ಬಂದಿದ್ದಂತೆ ಇವಳು. ಮಲ್ನಾಡ್ ಕಡೆ ಎಲ್ಲೋ ಯಾರೂ ಕಾಲಿಡದ ದುರ್ಗಮ ಕಾಡಿನ ನಡುವೆ ಒಂದು ವುಡನ್ ಕ್ಯಾಬಿನ್ ತರ ಮಾಡ್ಕೊಂಡು ಜೀವ್ನ ಮಾಡ್ತಿದಾಳಂತೆ. ಕೂಗಳತೆ ದೂರದಲ್ಲೇ ಒಂದು ಹೊಳೆ ಅಂತೆ. ಅಲ್ಲೇ ಇವಳ ಸ್ನಾನ ಅಂತೆ. ಒಂಚೂರೂ ಬಟ್ಟೆ ಇಲ್ಲದೇ ಯಾರಾದ್ರೂ ನೋಡ್ತಾರೆ ಅಂತ ಭಯ ಇಲ್ಲದೇ ಹೊಳೆಯಲ್ಲಿ ಈಜಾಡೋದು ಎಷ್ಟು ಲಿಬರೇಟಿಂಗ್ ಗೊತ್ತಾ ಅಂದ್ಲು. ನಂಗೇನ್ ಗೊತ್ತು. ನಂಗೆ ಬಾತ್ರೂಮಲ್ಲಿ ಸ್ನಾನ ಮಾಡ್ತಿದ್ರು ಅಂಡರ್‌ವೇರ್ ಇರಲೇಬೇಕು. ಸರಿ ಕತೆಗೆ ಬರಣ. ಸಾರಿ ಕನಸಿಗೆ. ಅವಳ ವುಡನ್ ಕ್ಯಾಬಿನ್‌ಗೆ ಕೆಲವೊಮ್ಮೆ ಆನೆಗಳು ಬಂದು ಮೈ ತಿಕ್ಕುತ್ತವಂತೆ. ಆದ್ರೆ ಯಾವತ್ತೂ ಬೀಳಿಸುವಷ್ಟು ಜೋರಾಗಿ ತಿಕ್ಕಿಲ್ಲವಂತೆ. ಇನ್ನೊಮ್ಮೆ ಜೋರು ಬಿರುಗಾಳಿ ಬಂದು ಕಾಡಿನ ಬಾನೆತ್ತರದ ಮರಗಳೆಲ್ಲ ಉರುಳಿ ಬಿದ್ದವಂತೆ. ಕರೆಂಟ್ ಹೋಯ್ತು ಅನ್ನೋದು ಬಿಟ್ಟರೆ ಬೇರೆ ಏನೂ ಆಗ್ಲಿಲ್ಲವಂತೆ. ಕಾಡಲ್ಲಿ ಕರೆಂಟಾ? ಕನಸಲ್ಲೆಂತ ಲಾಜಿಕ್ಕು. ಒಕೆ. ಇದುವರೆಗೂ ಯಾವ ಮನುಷ್ಯರ, ನಾಗರಿಕತೆಯ ಸುಳಿವೂ ಇಲ್ಲದೇ ಎಷ್ಟು ಆರಾಮಾಗಿ ಬದುಕ್ತಿದ್ದೀನಿ ಗೊತ್ತಾ? ನೀನೂ ಬಾ. ಮಟನ್ ಬಾರ್ಬಿಕ್ಯೂ ಸಕತ್ತಾಗ್ ಮಾಡ್ತೀನಿ. ಇಷ್ಟು ವರ್ಷ ನಾನು ಯಾರ ಹತ್ರಾನೂ ಮಾತಾಡಬೇಕು ಅನ್ಸಿರ್ಲಿಲ್ಲ. ನಿನ್ನತ್ರ ಮಾತಾಡ್ತಿದ್ದೀನಿ. ಯಾರತ್ರಾನೂ ಇರಬೇಕು ಅನ್ಸಿರ್ಲಿಲ್ಲ. ಆ ಕಾಡಿನ ನಡುವೆ ಇರೋ ಕ್ಯಾಬಿನ್ನಲ್ಲಿ ನಿನ್ನ್ ಜತೆ ಇದ್ದುಬಿಡಬೇಕು ಅನ್ನಿಸ್ತಿದೆ. ಬರ್ತೀಯಾ ತಾನೇ ಅಂದಳು. ಅಷ್ಟು ಚಂದ ಹುಡುಗಿ ಅಷ್ಟು ಚಂದವಾಗಿ ಕೇಳಿದ್ರೆ ಯಾವನ್ ಇಲ್ಲ ಅಂತಾನೆ. ಬರ್ತೀನಿ ಅಂದೆ. ತುಟಿಗೆ ಮುತ್ತು ಕೊಟ್ಟೇಬಿಟ್ಟಳು. ಆ ಕಡೆ ನನ್ನ ಕಸಿನ್ಸು ಸೀರೆ ಉಟ್ಟುಕೊಂಡು ಆರತಿ ಹಿಡ್ಕೊಂಡು ಬರ್ತಿದ್ದಾರೆ. ಹಿಂದೆ ವಾಲ್ಗದವರು. ನಾಗರ ಪಂಚಮಿ ಮದ್ವೆ ಮನೆ ಆಯ್ತು ಸಟಕ್ಕಂತ. ಕನಸು ಎಷ್ಟ್ ಚಂದ. ಥೇಟ್ ಸಿನಿಮಾ ತರ. ಸಿನಿಮಾ ಎಷ್ಟ್ ಚಂದ. ಥೇಟ್ ಕನಸಿನ್ ತರ.

    ಒಟ್ನಲ್ಲಿ ಗರ್ಲ್‌ಫ್ರೆಂಡ್ ಸಿಕ್ಲು. ಅವಳ ಜತೆ ನಮ್ಮಜ್ಜಿ ಮನೆಯಲ್ಲಿರೋ ಒಂದೇ ರೂಮಲ್ಲಿ ನಾವಿಬ್ರೂ ಒಬ್ಬರ ಮೇಲೊಬ್ಬರು ಮಲ್ಕೊಂಡಿದ್ದಾಗ ಫೋನಲ್ಲಿ ಒಂದು ನ್ಯೂಸ್ ಆರ್ಟಿಕಲ್ ನೋಡ್ದೆ. ‘Netflix CEO Ted Sarandos Fired. ಹೊಸ CEO…’ ಇವ್ಳೇ. ನನ್ನ್ ಗರ್ಲ್‌ಫ್ರೆಂಡು. ಫಾರಿನ್ ಹುಡುಗಿ. ಇಲ್ಲೇ ನನ್ನ್ ಎದೆಮೇಲೆ ಮಲ್ಕೊಂಡಿದಾಳೆ. ನನ್ನ ತುಟಿಗೆ ಮುತ್ತಿಕ್ಕಿ "Are you happy for me?” ಅಂದ್ಲು. "I’m so happy. ಏನಾದ್ರೂ ಸಬ್‌ಟೈಟಲ್ ಕೆಲ್ಸ ಇದ್ರೆ ಕೊಡ್ಸು" ಅಂದೆ. ಥೂ ನನ್ನಯ್ಯನ್.

    ಹಿಂಗೇ ಹಿತ್ಲಲ್ಲಿ ನಾನೂ ನನ್ನ್ ಕಸಿನ್ಸು ಕರಿಬೇವಿನ ಮರಕ್ಕೆ ಒರಗಿಕೊಂಡು ಮಾತಾಡ್ತಿದ್ವಿ. ಎಂಥ ಹುಡುಗಿ ಪಟಾಯ್ಸ್‌‍ಬಿಟ್ಟೆ ಅಂತ ಅವ್ರು ರೇಗಿಸ್ತಿದ್ರು. ಅಷ್ಟರಲ್ಲಿ ಆ ಹುಡುಗಿ ಅಳುತ್ತಾ ಓಡಿಬಂದ್ಲು. ಕಟ್ಟೆ ಮೇಲೆ ಕೂರಿಸಿ ಏನಾಯ್ತು ಅಂತ ಕೇಳಿದಾಗ. ಯಾರೋ ಇವಳು ಹಪ್ಪಳ ಒಣ ಹಾಕಬೇಕಾದರೆ ಬಂದು ಕೈ ಹಿಡಿದುಕೊಂಡು ಎಳೆದಾಡಿದನಂತೆ. ಪಾಪ ಹುಡುಗಿ ತರತರ ನಡುಗುತ್ತಾ ಗುಬ್ಬಿಮರಿ ತರ ಕೂತು ಬಿಕ್ಕಳಿಸುತ್ತಿದ್ದಾಳೆ. ಅವಳು ಇದೇ ಕಾರಣಕ್ಕೆ ಎಲ್ಲ ಬಿಟ್ಟು ಕಾಡು ಸೇರಿಕೊಂಡಿದ್ದಂತೆ. ನನಿಗೆ ಏನು ಹೇಳುವುದೋ ತಿಳಿಯಲಿಲ್ಲ. ಸುಮ್ಮನೆ ತಲೆ ಸವರಿದೆ. "xvideos ಅಲ್ಲಿ ಎಲ್ಲ ಮಾಡ್ತೀರಾ ನಾನ್ ಕೇಳಿದ್ರೆ ಓಡೋಗ್ತೀಯ" ಅನ್ನುತ್ತಾ ಒಂದು ಆಕೃತಿ ಹಿತ್ತಲಿಗೆ ಬಂತು. ಅವನ ಮುಖ ಕಂಡವಳೇ ಹುಡುಗಿ ಹಾವು ಮೆಟ್ಟಿದಂತೆ ಕಿರುಚಿದಳು. ನಮ್ಮ ಪಕ್ಕದ ಮನೆಯವನೇ. ಕೋಪದಲ್ಲಿ ಅವನ ಬೆನ್ನಟ್ಟಿದೆ. ಅವನು ಓಡಿ ಹೋಗಿ ಮನೆ ಮುಂದೆ ನಿಂತಿದ್ದ ಮದುವೆ ಬಸ್ ಹತ್ತಿದ. ಮದುವೆ ಅಂಜಿನಪ್ಪಂದು. ಅವನಿಗೆ ಆಗಲೇ ಹೈಸ್ಕೂಲ್ ವಯಸ್ಸಿನ ಮಗ ಇದ್ದಾನೆ. ಇರಲಿ. ನಮ್ಮ ಹುಡುಗಿಯನ್ನ ಎಳೆದವನು ಬಾನೆಟ್ ಮೇಲೆ ಕೂತಿದ್ದ. ಬಸ್ಸಲ್ಲಿದ್ದ ಎಲ್ಲರೂ ಪರಿಚಯದವರೇ. ಇವನೂ ಪರಿಚಯದವನೇ. ನನಿಗೆ ಅವನನ್ನ ಏನು ಮಾಡಬೇಕೋ ತಿಳಿಯಲಿಲ್ಲ. ಮದುವೆ ಬಸ್ ಆಗಲೇ ಚೌಲ್ಟ್ರಿ ಹತ್ರ ಬಂತು. ನಾನು ಇಳಿದು ಹುಡುಗಿಯನ್ನ ಸಮಾಧಾನ ಮಾಡುವ ಕಾತರದಿಂದ ವಾಪಸ್ ಮನೆ ಕಡೆ ಹೊರಟೆ.

    ವಾಪಸ್ ಬಂದ್ರೆ ಅಜ್ಜಿ ಮನೆಯಲ್ಲಿ ಹುಡುಗಿಯೂ ಇಲ್ಲ. ನನ್ನ ಕಸಿನ್ಸೂ ಇಲ್ಲ. ನಾಗರ ಪಂಚಮಿನೂ ಅಲ್ಲ ಅವತ್ತು. ಅಜ್ಜಿ ಕರಿ ಹಿಂಡಿಯನ್ನ ಮಡಕೆಯಲ್ಲಿ ಕಲಸಿ ಬಿಸಿಲಿಗೆ ಒಣ ಹಾಕಿಕೊಂಡು ಕಟ್ಟೆ ಮೇಲೆ ಕೂತಿತ್ತು. "ಯಾವಾಗ್ ಬಂದೆ ಅಪ್ಪಾ" ಅಂತು. ಅಲ್ಲಿಗೆ ಎಚ್ಚರವಾಯ್ತು.

 ಇವತ್ತು ಬೆಳಿಗ್ಗೆ ನಿತಿನ ಕಾಲ್ ಮಾಡಿದ್ದ. ವಾರದ ಹಿಂದೆ ಅವನ ಶಾರ್ಟ್ ಫಿಲ್ಮ್ ಸ್ಕ್ರಿಪ್ಟ್ ಕಳ್ಸಿದ್ದ. ಇನ್ನೆರಡು ವಾರದಲ್ಲಿ ಶೂಟ್ ಮಾಡ್ಬೇಕು ಮಗಾ, ಓದಿ ಫೀಡ್‌ಬ್ಯಾಕ್ ಕೊಡು ಅಂತ ನಾಲ್ಕನೇ ಸರ್ತಿ ನೆನಪಿಸಿದ. ಆಯ್ತು ಮಗಾ ಇವತ್ತು ತಲೆ ಮೇಲ್ ತಲೆ ಹೋಗ್ಲಿ ಓದಿ ಸಂಜೆ ಕಾಲ್ ಮಾಡ್ತೀನಿ ಅಂದು ನಾನು ಫೋನ್ ಇಡುತ್ಲೂ ನನ್ನ ರೂಮಲ್ಲಿ ಶೆಲ್ಫ್ ಮೇಲಿದ್ದ ಫ್ರಾಂಝ್ ಕಾಫ್ಕಾನ 'The Metamorphosis' ಕಿಸಿಕಿಸಿ ನಕ್ಕು "ಅವ್ನು ಓದ್ದಂಗೆ ನೀನ್ ಕೇಳ್ದಂಗೆ" ಅಂತು. ನನಿಗೆ ಮೈಯೆಲ್ಲಾ ಉರೀತು. ಈ ಕಾಪಿರೈಟ್ ಮುಗ್ದಿರೋ, ಚೀಪ್ ಪೇಪರಲ್ಲಿ ಪ್ರಿಂಟ್ ಮಾಡಿರೋ ಈ ತುಕಾಲಿ ಪುಸ್ತಕಕ್ಕೆ ದುಡ್ಡು ಕೊಟ್ಟ ತಂದ ನಂಗೇ ಉಲ್ಟಾ ಮಾತಾಡೋ ಅಷ್ಟು ಸೊಕ್ಕಾ?

"ಅಲ್ಲಾ ಗುರು ಏನೋ ಬ್ಲಾಸಮ್ ಬುಕ್ ಹೌಸಲ್ಲಿದಿಯ, ರೇಟ್ ಬೇರೆ ಕಮ್ಮಿ ಅಂತ ತಂದಿದ್ದು. ನಾನೇನ್ ನಿನ್ನ ಕಟ್ಕೊತೀನಿ ಅಂತ ಅಗ್ರೀಮೆಂಟ್ ಮಾಡ್ಕೊಂಡಿದೀನಾ? ‘Kafkaesque’ ಅನ್ನೋದು ಇವಾಗ ಪಾಪ್ ಕಲ್ಚರಲ್ಲೇ ಸೇರ್ಕೊಂಡಿದೆ. ನಿನ್ನ ಓದಿನೇ ತಿಳ್ಕೊಬೇಕು ಅಂತೇನಿಲ್ಲ. ಯಜಮಾನಂಗೆ ಎದುರು ಮಾತೋಡೋದು ಬಿಟ್ಟು ಮುಚ್ಕೊಂಡು ಮೂಲೇಲಿ ಬಿದ್ದಿರು" ಅಂತ ಗದರಿದೆ.

The Metamorphosis ಬೈಂಡ್ ಮೇಲೆ ಕೈ ಹಾಕಿ ಹಿಂದಿನಿಂದ ಇಣುಕಿದ ಬಾಬ್ ಡಿಲನ್‌ನ ‘Chronicles’ ಇನ್ನೊಂದ್ಸಲ ಬೊಗಳು ಹಲ್ಕಾ ನನ್ಮಗನೆ ಎನ್ನುವಂತೆ ಸ್ವಲ್ಪ ಹೊತ್ತು ನನ್ನ ಗುರಾಯಿಸಿತು. ಇದನ್ನ ಫ್ಲಿಪ್‌ಕಾರ್ಟಿಂದ ಆರ್ಡರ್ ಮಾಡಿ ಏಳೆಂಟು ದಿನ ಕಾದು ತರಿಸಿಕೊಂಡಿದ್ದೆ. ಒಂದೆರಡು ಪೇಜ್ ಓದಿ ಇನ್ಸ್ಟಾಗ್ರಾಮಲ್ಲಿ ಸ್ಟೋರಿ ಬೇರೆ ಪೋಸ್ಟ್ ಮಾಡಿಬಿಟ್ಟಿದ್ದೆ. ಆ ವಿಷಯಾನೆಲ್ಲ ತೆಗೆದು ಶೆಲ್ಫಲ್ಲಿರೋ ಬುಕ್ಸ್ ಮುಂದೆಲ್ಲಾ ನನ್ನ ಮಾನ ತೆಗೆದರೆ ಏನಪ್ಪಾ ಮಾಡೋದು ಅಂತ ನಂಗೆ ಅಂಜಿಕೆಯಾಯ್ತು. ಆದ್ರೆ  ‘Chronicles’ ಸ್ಪೈನಲ್ಲಿ ಇದ್ದಿದ್ದೇ ಬೇರೆ. 

"ಲೇ ಗೂಬೆ. ನಾನ್ ಇಲ್ಲಿಗೆ ಬಂದು ಮನೆ ಮಾಡಿದ್ಮೇಲೇನೆ ಆ ಕರ್ವಾಲೋನ ಎರ್ಡ್ ಸಲ ಓದಿದೀಯ. ನಿಮ್ಮ ಸಿನಿಮಾ ಆಫೀಸಲ್ಲಿ ಮತ್ತೆ 'ಅಣ್ಣನ ನೆನಪು' ಓದ್ದೆ ಅಂತ ನನ್ನ ಟ್ವಿಟ್ಟರ್ ಫ್ರೆಂಡ್ಸ್ ಟೆಕ್ಸ್ಟ್ ಮಾಡಿದ್ರು. ಅಂತದ್ರಲ್ಲಿ ನಾನೂರುಪಾಯಿ ಕೊಟ್ಟು ನನ್ನ ತರ್ಸಿ ಓದ್ದೆ ಧೂಳ್ ತಿನ್ನುಸ್ತಾ ಇದೀಯಲ್ಲ ನೀನ್ ಉದ್ಧಾರ ಆಗ್ತೀಯಾ" ಅಂತು.

ಎಲ್ಲಾ ಲಾಜಿಕಲ್ ಪಾಯಿಂಟ್ಸ್ ಮಾತಾಡಿದ್ರೆ ವಾದ ಮಾಡೋದು ಕಷ್ಟ. ಆದ್ರೂ ನಾನು ಮೀಸೆ ಮಣ್ಣಾಗಲಿಲ್ಲ ಅನ್ನೋ ತರ "ಸ್ವಾಮಿ ನಾನು ದಿನಾ ಹೊತ್ತು ಮೂಡಿದ್ರೆ ನಿಮ್ಮಪ್ಪ ಬಾಬ್ ಡಿಲನ್‌ದು ನಾಕ್ ಹಾಡ್ ಕೇಳ್ತೀನಿ. ಮೊನ್ನೆ ಸ್ಪಾಟಿಫೈ wrappedನಲ್ಲಿ ಟಾಪ್ 5 ಆರ್ಟಿಸ್ಟ್ಸ್ ಅಲ್ಲಿ ಅವ್ನೂ ಇದ್ದ. ಅಷ್ಟು ಅಭಿಮಾನ ಇಲ್ದಿದ್ರೆ ನಿನ್ನ ಯಾಕ್ ದತ್ತು ತಗೊಂತಿದ್ದೆ. ಸ್ವಲ್ಪ ಹಾಳೆ ಬಿಗಿ ಹಿಡಿದು ಮಾತಾಡು" ಅಂದೆ. ನನ್ನ ವಾದ ನನಿಗೇ ಶಾಟದ್ ತರ ಅನ್ನುಸ್ತು. ನಾನು ಏನ್ ಮಾತಾಡ್ಲಿ ಅಂತ ಯೋಚನೆ ಮಾಡುತ್ತಿರುವಷ್ಟರಲ್ಲಿ ಮತ್ತೊಂದು ವಯಸ್ಸಾದ ಕುಗ್ಗಿದ ದನಿ ಕೇಳಿತು. ಕುಂ ವೀರಭದ್ರಪ್ಪ ಅವರ "ಪಕ್ಷಿಗಳು".

"ಮುಚ್ರಲೇ. ನಿನ್ನೆ ಮೊನ್ನೆ ಬಂದು ನೀವೇ ಇಷ್ಟು ನಿಗ್ರಾಡ್ತೀರಲ್ಲ; ಈ ಸುವ್ವರ್ ನನ್ಮಗ ನನ್ನ ದಾವಣಗೆರೆ ಲೈಬ್ರರಿಯಿಂದ 2013ರಲ್ಲಿ ತಗೊಂಡ್ ಬಂದೋನು ಇನ್ನೂ ಕವರ್ ಪೇಜೂ ಓಪನ್ ಮಾಡಿಲ್ಲ. ನಿಯತ್ತಾಗಿ ವಾಪಸ್ಸಾದ್ರೂ ಕೊಟ್ಟಿದ್ರೆ ಇಷ್ಟೊತ್ಗೆ ಒಂದೈವತ್ತು ಮಂದಿಯಾದ್ರೂ ಓದ್ತಿರ್ಲಿಲ್ವ ನನ್ನ? ಒಂದ್ ಲೆಕ್ಕದಲ್ಲಿ ನಾನು ಸೆರೆಯಾಳು ಇಲ್ಲಿ. ನನ್ನ್ ಕಷ್ಟ ಯಾರಿಗೇಳನ?" ಅಂದು ಅದು ಬಂದಿದ್ದ ಮೂಲೆಗೆ ಮತ್ತೆ ಹೋಗಿ ಮಕಾಡೆ ಮಲಗಿ ಬಿಕ್ಕತೊಡಗಿತು. ಅಲ್ಲೇ ಪಕ್ಕದಲ್ಲಿದ್ದ ಒಂದೆರಡು ಹೊಸ ಪುಸ್ತಕಗಳು ಆ ಕಡೆ ಈ ಕಡೆ ತೂರಾಡ್ತಾ ಆ ಮುದಿ ಪುಸ್ತಕಕ್ಕೆ ಗಾಳಿ ಬೀಸತೊಡಗಿದವು. ಇವತ್ತು ಯಾವ ಮಗ್ಗುಲಲ್ಲಿ ಎದ್ನಪ್ಪಾ ಅಂತ ನಾನು "ಆಯ್ತು ಬಿಡ್ರೋ ಇನ್ನೇನು ಜನವರಿ ಬಂತು. ಓದ್ದಿರೋ ಪುಸ್ತಕಾನೆಲ್ಲ ಓದೋದನ್ನೇ ಹೊಸ ವರ್ಷದ ರೆಸಲ್ಯೂಷನ್ ಮಾಡ್ಕೋತೀನಿ" ಅಂದೆ. ರೆಸಲ್ಯೂಷನ್ ಅಂದಕೂಡ್ಲೇ ಶೆಲ್ಫ್ ಮೇಲಿದ್ದ ಪುಸ್ತಕಗಳೆಲ್ಲಾ ಬೆಚ್ಚಿಬಿದ್ದು "ಅಣ್ಣಾ ನೀನು ಬೇಕಾದ್ರೆ ನಮ್ಮನ್ನೆಲ್ಲಾ ಹರಿದು ಮಂಡಕ್ಕಿ ತಿನ್ನೋಕೆ ಯೂಸ್ ಮಾಡು. ಆದ್ರೆ ರೆಸಲ್ಯೂಷನ್ ಅನ್ನೋ ಪದ ಮಾತ್ರ ಎತ್ತಬೇಡ" ಅಂತ ಹಣೆ ನೆಲಕ್ಕೆ ಮುಟ್ಟುವಂತೆ ನೆಲಕ್ಕೆ ಬಿದ್ದು ಅಂಗಲಾಚತೊಡಗಿದವು. 

ನಾನು ಅರ್ಧ ಓದಿ ಬಿಟ್ಟಿದ್ದ ವಿವೇಕ ಶಾನಭಾಗರ 'ಒಂದು ಬದಿ ಕಡಲು' ಕಾನೂರು ಹೆಗ್ಗಡತಿಯನ್ನ ದಾಟಿಕೊಂಡು ಮುಂದೆ ಬಂದು "ನನ್ನ ಓನರ್ ಬೇರೆ ಯಾರೋ. ಪಾಪ ಓದ್ಲಿ ಅಂತ ಇವನಿಗೆ ಕೊಟ್ರೆ ಅರ್ಧ ಓದಿ ನನ್ನ ಗಾಳಿನೂ ಆಡದಿರೋ ಈ ಮೂಲೆಗೆ ಎಸೆದಿದ್ದಾನೆ. ಎರ್ಡ್ ದಿನದಲ್ಲಿ ಇವ್ನು ನೂರ್ ಪೇಜ್ ಓದಿದ್ದು ನೋಡಿದ್ರೆ ಸೋಮವಾರಕ್ಕೆ ನನ್ನ ಮುಗಿಸಿ ಮುಕ್ತಿ ಕೊಡ್ತಾನೆ ಅನ್ಕೊಂಡಿದ್ದೆ. ಆದ್ರೆ ಎರಡು ವರ್ಷದ ಮೇಲೆ ಇವತ್ತೇ ಮುಖ ತೋರುಸ್ತಿರೋದು ಇವ್ನು. ಇದಕ್ಕೆಲ್ಲಾ ಮುಖ್ಯ ಕಾರಣ ಆ ತೇಜಸ್ವಿ ಪುಸ್ತಕಗಳು. ಮೊದಲು ಅವನ್ನ ಹರಿದು ಬಿಸಾಕಿದ್ರೆ ನಮಗೆ ಉಳಿಗಾಲ. ಏನ್ ಮಕ ನೋಡ್ತಿದೀರಾ. ತದುಕ್ರೋ ಆ ಚಿದಂಬರ ರಹಸ್ಯಕ್ಕೆ" ಅನ್ನುತ್ಲೂ ಶೆಲ್ಫ್ ಮೇಲಿದ್ದ ಪುಸ್ತಕಗಳೆಲ್ಲ ಒಗ್ಗಟ್ಟಾಗಿ ಗುಂಪಾಗಿ ಜೋಡಿಸಿದ್ದ ತೇಜಸ್ವಿ ಪುಸ್ತಕಗಳ ಮೇಲೆ ದಾಳಿ ಮಾಡಿದವು. ನಾನು 'ಒಂದು ಬದಿ ಕಡಲು'ಗೆ ಸಮಾಧಾನ ಮಾಡೋದಕ್ಕೆ "ಗುರು ನಿಂದೇನು ತಪ್ಪಿಲ್ಲ. ಸಕತ್ ಎಂಗೇಜಿಂಗ್ ಆಗಿದ್ದೆ ನೀನು. ಆ ಟೈಮಲ್ಲಿ ಏನೋ ಕೆಲ್ಸ ಬಂತು. ದಯವಿಟ್ಟು ದಂಗೇನ ನಿಲ್ಸು ಇವತ್ತೇ ನಿನ್ನ ಓದ್ತೀನಿ" ಅಂತ ಕಿರುಚಿದ್ರೂ ಕೇಳದೆ ಚಿದಂಬರ ರಹಸ್ಯದ ಬುಕ್ ಮಾರ್ಕ್ ಹಿಡಿದುಕೊಂಡು ಜಗ್ಗಾಡುತ್ತಾ ಒಟ್ನಲ್ಲಿ ಕ್ರಾಂತಿ ಆಗ್ಲೇಬೇಕು ಅಂತ ಕೂಗುತ್ತಾ ದೊಂಬಿ ಜೋರು ಮಾಡಿದವು. "ನಾನೂ ತೇಜಸ್ವಿ ಬುಕ್ ಕಣ್ರೋ. ನನ್ನ ಇವ್ನು ಹತ್ತು ಪರ್ಸೆಂಟೂ ಓದಿಲ್ಲ" ಅಂತ 'ಹೊಸ ವಿಚಾರಗಳು' ಎಷ್ಟೇ ಅಂಗಲಾಚಿದರೂ ಅದಕ್ಕೂ ಸರಿಯಾಗಿ ಏಟುಗಳು ಬಿದ್ದವು. ಈ ದೊಂಬಿ ನಡೆಯುತ್ತಿರುವಾಗ ಮಂಚದ ಮೇಲೆ ಬಿದ್ದಿದ್ದ ನನ್ನ ಲ್ಯಾಪ್‌ಟಾಪ್‌ನಿಂದ ಸೌಂಡು ಬರುತ್ತಿರುವಂತೆ ಅನ್ನಿಸಿತು. ಅದನ್ನ ಬೆಳಿಗ್ಗೆಯಿಂದ ಆನೇ ಮಾಡಿರಲಿಲ್ಲ. ಆದ್ರೆ ಈ ಸಂಭಾಷಣೆ ಮೆಲ್ಲ ವಾಲ್ಯೂಮ್ ಅಲ್ಲಿ ಲ್ಯಾಪ್‌ಟಾಪ್‌ನ ಸ್ಪೀಕರಿನಿಂದ ಬರ್ತಾ ಇತ್ತು-

"ನೋಡು ಆ ಜುಜುಬಿ ಬುಕ್ಸ್‌ಗಳಿಗಿರುವಷ್ಟು ಒಗ್ಗಟ್ಟು ನಮ್ಮ ಸಿನಿಮಾಗಳಿಗಿಲ್ಲ. ನನ್ನನ್ನ ಈ ಹೊಸ ಲ್ಯಾಪ್‌ಟಾಪ್ ತಗೊಂಡಾಗ ಡೌನ್ಲೋಡ್ ಮಾಡಿದ್ದು. ಇನ್ನೂ ಈ ಲ್ಯಾಪ್‌ಟಾಪಲ್ಲಿರೋದು ವಿಂಡೋಸ್ ಮೀಡಿಯಾ ಪ್ಲೇಯರ್ರಾ ಇಲ್ಲಾ ವಿಎಲ್‌ಸಿನಾ ಅಂತಾನೇ ನನಿಗೆ ಗೊತ್ತಾಗಿಲ್ಲ. ಇದಕ್ಕೆಲ್ಲ ಕೊನೆಗಾಣಿಸಲೇಬೇಕು" ಕುರೋಸಾವಾನ 'High and Low’ ದನಿ.

"ಇವ್ರೇ ನಾನೂ ಟೊರೆಂಟಲ್ಲಿ ನಿಮ್ಮ ಜೊತೇನೇ  ಬಂದಿದ್ದು. ಜನ್ರ  ಹತ್ರ 'ಡಾ ಸ್ಟ್ರೇಂಜ್‌ಲವ್‌' ಅದ್ಬುತ ಸಿನಿಮಾ ಅಂತ ಬಿಲ್ಡಪ್ ಕೊಡೋದೇ ಆಯ್ತು ಇವಂದು. ನಾನೂ ಸ್ಟ್ಯಾನ್ಲಿ ಕ್ಯೂಬ್ರಿಕ್ಕಿಗೇ ಹುಟ್ಟಿರೋದು. ನನ್ನ ಮೂಸೂ ನೋಡ್ತಿಲ್ಲ" 'Barry Lyndon’ ವಾಯ್ಸು.

"ವಾರಕ್ಕೊಂದ್ಸಲ ಆ ದರಿದ್ರ 'ಬಿಗ್ ಲೆಬೋಸ್ಕಿ' ನೋಡ್ತಾ ಇರ್ತಾನೆ. ಮೊದಲು ಅದಿರೋ ಫೋಲ್ಡರನ್ನೇ ಕರಪ್ಟ್ ಮಾಡ್ಬಿಡಣ ಏನಂತೀರಾ?" ಸ್ಕಾರ್ಸೇಸಿಯ 'ಕಿಂಗ್ ಆಫ್ ಕಾಮೆಡಿ' ರಾಬರ್ಟ್ ಡಿ ನಿರೋ ವಾಯ್ಸಲ್ಲೇ ಇದನ್ನ ಹೇಳ್ತಾ ಇತ್ತು. ಹಿಂಗೇ ಬಿಟ್ರೇ ಲ್ಯಾಪ್‌ಟಾಪ್‌ನ ದೆಂಗಿ ದೇವ್ರು ಮಾಡ್ಬಿಡ್ತಾವೆ ಅಂತ ನಾನು ರಪ್ ಅಂತ ಸ್ವಿಚ್ ಆನ್ ಮಾಡಿ ಡಿಸ್ಕ್ ಫಾರ್ಮ್ಯಾಟ್ ಮಾಡೋ ತರ ಡವ್ ಮಾಡಿದಮೇಲೆ ಸ್ಪೀಕರ್ ಸೈಲೆಂಟ್ ಆಯ್ತು. ಶೆಲ್ಫ್ ಮೇಲೆ ಬುಕ್‌ಗಳ ಜಗಳ ಮುಂದುವರೀತಾನೇ ಇತ್ತಲ್ಲ ಮಾಡ್ತೀನಿ ತಡೀರಿ ನಿಮಿಗೆ ಅಂತ ಹಾಲ್‌ನಲ್ಲಿ ಧಾರವಾಹಿ ನೋಡ್ತಿದ್ದ ನಮ್ಮಮ್ಮನನ್ನ ಕೂಗಿ "ನನ್ನ ಬುಕ್‌ಗಳನ್ನೆಲ್ಲ ತೂಕಕ್ಕೆ ಹಾಕಿಬಿಡು" ಅಂದೆ. ಆ ಕಡೆಯಿಂದ ಉತ್ತರ ಬರುವುದರೊಳಗೆ ಶೆಲ್ಫ್ ಮೊದಲಿನ ತರ ಆಗಿತ್ತು. ಇವಾಗ ನಾನು ಮತ್ತೆ ಬಿಗ್ ಲೆಬೋಸ್ಕಿ ನೋಡ್ತಾ ಇರೋದು ಕಂಡು ಪುಸ್ತಕಗಳೆಲ್ಲಾ ಗೋಡೆ ಕಡೆ ಮುಖ ಮಾಡಿ ನಿಂತಿದಾವೆ. ನಿತಿನನ ಶಾರ್ಟ್ ಫಿಲ್ಮ್ ಸ್ಕ್ರಿಪ್ಟ್ ಲ್ಯಾಪ್‌ಟಾಪಲ್ಲಿ ಗೊರಾಗೊರಾ ಅಂತಿದೆ.

ನಮ್ಮ ಪ್ರೀತಿಯ ರಾಮು

 ನನಿಗೆ ಒಂದು ಒಂಬತ್ತು ವರ್ಷ ಅವಾಗ. ಜೋಗಿ ರಿಲೀಸಾಗಿದ್ದ ಟೈಮು. ಅವಾಗ ಅಷ್ಟು ಸಿನಿಮಾ ನೋಡೋ ಚಟ ಇರಲಿಲ್ಲ. ಆದ್ರೂ ಎಲ್ರೂ ಜೋಗಿ ಜೋಗಿ ಅಂತಿದಾರೆ ಅಂದಮೇಲೆ ಆ ವಸ್ತು ನನಿಗೂ ಬೇಕು ಅಂತ ಹಠ ಹಿಡಿದು ಕುತ್ಕೊಂಡೆ. ಒಂದು ವಾರ ಅತ್ತು, ಊಟ ಬಿಟ್ಟು, ಒದೆ ತಿನ್ನೋ ಶಾಸ್ತ್ರ ಎಲ್ಲ ಮುಗಿದಮೇಲೆ ಹಾಳಾಗ್ ಹೋಗ್ಲಿ ತೋರುಸ್ಕೊಂಡು ಬಾ ಅಂತ ನಮ್ಮ ಒಬ್ಬಳು ಚಿಕ್ಕಮ್ಮನ ಜೊತೆಗೆ ಕಳಿಸಿದ್ರು. ದಾವಣಗೆರೆಯ ಪುಷ್ಪಾಂಜಲಿ ಟಾಕೀಸ್ ಮುಂದೆ ಹೋಗಿ ನೋಡಿದ್ರೆ ಜನ ಜಾತ್ರೆ. ಈ ರಶ್ಶಲ್ಲಿ ಟಿಕೆಟ್ ಸಿಗಲ್ಲ ಅಂತ ಗೊತ್ತಾಯ್ತು. ಪಕ್ಕದ ಗೀತಾಂಜಲಿಯಲ್ಲಿ ಗೌರಮ್ಮ ಐತೆ ಅದಕ್ಕೆ ಟಿಕೆಟ್ ಸಿಗತ್ತೆ ಅಂತ ನಮ್ಮನ್ನ ಬಿಟ್ಟು ಹೋಗಲು ಬಂದಿದ್ದ ನಮ್ಮ ಮಾಮ ಹೇಳಿದ. ನನಿಗೇನೂ ಜೋಗಿನೇ ನೋಡಬೇಕು ಅಂತ ಐಡಿಯಾಲಾಜಿಕಲ್ ಕಮಿಟ್ಮೆಂಟ್ ಇರ್ಲಿಲ್ಲ. ಸರಿ ಆಯ್ತು ಅಂತ ಗೌರಮ್ಮಕ್ಕೆ ಟಿಕೆಟ್ ತಗೊಂಡು ಹೋದ್ವಿ. ಅದು ಯಾವ ಲೆವೆಲ್ಲಿಗೆ ತಲೇಲಿ ಕುತ್ಕೊಂಡ್ಬಿಡ್ತು ಅಂದ್ರೆ ನೆಕ್ಸ್ಟು ಚೆಲುವಿನ ಚಿತ್ತಾರ ನೋಡೋ ತನಕ ನನಿಗೆ ಸಿನಿಮಾನ ಅಳೆಯೋ ಮೆಟ್ರಿಕ್ಕೇ ಗೌರಮ್ಮ ಆಗಿತ್ತು. ಸಿನಿಮಾದಲ್ಲಿ ಎರ್ಡೇ ಟೈಪು- ಗೌರಮ್ಮಕ್ಕಿಂತ ಚೆನ್ನಾಗಿರೋದು, ಗೌರಮ್ಮದಷ್ಟೇನು ಚೆನ್ನಾಗಿಲ್ದಿರೋದು.

ಮೂರ್ನಾಕು ತಿಂಗಳ ಮುಂಚೆ ನಮ್ಮಪ್ಪ ತೀರಿಕೊಂಡು ನಾನು ಓದೋಕೆ ಅಂತ ನಮ್ಮಜ್ಜಿ ಊರಿಗೆ ಬಂದಿದ್ದೆ. ನಮ್ಮಜ್ಜಿ ಮನೆಗೆ ಕ್ರಿಕೆಟ್ ನೋಡೋಕೆ ಬರ್ತಿದ್ದ ನಮ್ಮ ಮಾವನ ಗ್ಯಾಂಗಿನಲ್ಲಿ ಒಬ್ಬ ಅದೇ ದಿನ ರಿಲೀಸಾಗಿದ್ದ ಆಟೋ ಶಂಕರ್ ನೋಡಿಕೊಂಡು ಬಂದಿದ್ದ. ಅವನೂ ಉಪೇಂದ್ರನ ಫ್ಯಾನೇ. ಆಟೋ ಶಂಕರ್ ಚೆನಾಗೈತೆ ಆದ್ರೆ ಗೌರಮ್ಮದಷ್ಟು ಚೆನಾಗಿಲ್ಲ ಅಂತ ಹೇಳ್ದ. ಅವನೇ ರಾಮಣ್ಣ. 

ಹಿಂಗೆ ಪರಿಚಯವಾದ ರಾಮಣ್ಣ AKA ರಮೇಶ್ ನಂಗಿಂತ ಎಂಟೊಂಬತ್ತು ವರ್ಷ ದೊಡ್ಡವನು. ಅವಾಗ ಡಿಗ್ರಿ ಫಸ್ಟ್ ಇಯರ್ರೋ ಸೆಕೆಂಡ್ ಇಯರ್ರೋ ಓದ್ತಿದ್ದ ಅನ್ಸತ್ತೆ. ಕಾಲೇಜಿಗೆ ದಿನಾ ದಾವಣಗೆರೆಗೆ ಹೋಗ್ತಿದ್ದ ಇವನು ಹಳ್ಳಿಯಲ್ಲೇ ಬಿದ್ದಿರ್ತಿದ್ದ ನಮಗೆಲ್ಲ ದಿನಾ ಏನಾದ್ರೂ ಒಂದು ಹೊಸ ಹೊಸ ವಿಷಯಗಳನ್ನ ತಗೊಂಡು ಬರ್ತಿದ್ದ. ದಿನಾ ಬಸ್ಸಿಗೆ ಒಂದೇ ನೋಟ್‌ಬುಕ್ ಹಿಡಿದುಕೊಂಡು ಕಿವಿಗೆ ಇಯರ್ ಫೋನ್ ಸಿಕ್ಕಿಸಿಕೊಂಡು ಇಸ್ತ್ರೀ ಮಾಡಿದ ಬಟ್ಟೆ ಹಾಕಿಕೊಂಡು ಹೋಗ್ತಿದ್ದ ರಾಮಣ್ಣ ಆ ಕೊಂಪೆಯಲ್ಲಿ ಒಂದು ಸ್ಪೆಷಲ್ ಐಟಂ ತರ ಕಾಣ್ತಿದ್ದ. ಪ್ರತಿ ವಾರ ರಿಲೀಸಾಗ್ತಿದ್ದ ಸಿನಿಮಾಗಳನ್ನೆಲ್ಲ ಒಂದೂ ಬಿಡದಂಗೆ ನೋಡಿಕೊಂಡು ಬಂದು ಗೌರಮ್ಮಕ್ಕಿಂತ ಚೆನಾಗಿದ್ಯ ಇಲ್ವಾ ಅಂತ ಹೇಳ್ತಿದ್ದ. ಮುಂಗಾರುಮಳೆಯನ್ನ ಮೊದಲ ದಿನವೇ ನೋಡಿಕೊಂಡು ಬಂದು ಮೊಲದ ಸೀನ್ ಎಕ್ಸ್‌ಪ್ಲೇನ್ ಮಾಡ್ತಾ ಅತ್ತೂ ಅತ್ತೂ ಸಾಕಾಯ್ತು ಅಂತ ನನಿಗೆ ಅದರ ಬಗ್ಗೆ ಮೊದಲು ಸುದ್ದಿ ಮುಟ್ಟಿಸಿದವನು ಇವನೇ. ಆ ಟೈಮಲ್ಲಂತೂ ನಾನು ದೊಡ್ದವನಾದಮೇಲೆ ರಾಮಣ್ಣನ ತರ ಆಗಬೇಕು ಅಂತ್ ಫಿಕ್ಸ್ ಆಗ್ಬಿಟ್ಟಿದ್ದೆ.

ರಾಮಣ್ಣ ಅಷ್ಟು ಬುದ್ಧಿವಂತನಾಗಿ ನನಗೆ ಕಾಣ್ಸೋದಕ್ಕೆ ಆ ಊರೂ ಕಾರಣ ಇರಬಹುದು. ಯಾಕಂದ್ರೆ ಕ್ರಿಕೆಟ್ ನೋಡ್ತಿದ್ದಾಗ ಮಳೆಯಿಂದಾಗಿ ಪಂದ್ಯ ನಿಂತಿದೆ ಇನ್ನ ಮುವತ್ತು ನಿಮಿಷದಲ್ಲಿ ಪ್ರಾರಂಭವಾಗತ್ತೆ ಅಂತೆ ಕೆಳಗಡೆ ಬರ್ತಾ ಇರೋ ಇಂಗ್ಲಿಷ್ ಟೆಕ್ಸ್ಟನ್ನ ಓದಿ ಅದರ ಅರ್ಥವನ್ನ ಹೇಳಬಲ್ಲವನು ಅಲ್ಲಿದ್ದಿದ್ದು ಇವನೊಬ್ಬನೇ. ಜೊತೆಗೆ ಯಾವ್ದೇ ಕೆಲ್ಸಕ್ಕೂ ಬರೀ ಹಳೇಕಾಲದ ಮೆಥಡ್ಡನ್ನೇ ಹಿಡಿಯುತ್ತಿದ್ದ ಆ ಜನರ ನಡುವೆ ಹೊಸ ಕಾಲದ ಹೊಸ ಹೊಸ ಎಕ್ಸ್‌ಪೆರಿಮೆಂಟುಗಳನ್ನ ಇವನು ಮಾಡ್ತಿದ್ದ. ಒಂದ್ಸಲ ಗಣೇಶನ್ನ ಕೂರ್ಸಿದ್ದಾಗ ಎಲ್ರೂ ಮಾಮೂಲಿ ತರ ಬಾಳೇ ಕಂದು ಮಾವಿನಸೊಪ್ಪು ಒಂದೆರಡು ಡಿಮ್ ಅಂಡ್ ಡಿಪ್ ಲೈಟ್ ಸರ ತಂದು ನಾಳೆ ಟೇಬಲ್ ಮೇಲಿಟ್ಬಿಟ್ರೆ ಮುಗೀತು ಅನ್ಕೊಂಡಿದ್ರು. ಇವನು ಹುಡುಗರೆನ್ನೆಲ್ಲ ಗುಡ್ಡೆ ಹಾಕಿಕೊಂಡು ಅಲ್ಲಿ ತರಿಸಿದ್ದ ಬಣ್ಣದ ಪೇಪರ್‌ಗಳು ತೆಂಗಿನ ಗರಿಯ ಕಡ್ಡಿಗಳೆನ್ನಲ್ಲ ಕಟ್ ಮಾಡ್ತಾ ಕೂತ್ಕೊಂಡ. ರಾತ್ರಿ ಎರಡು ಮೂರು ಗಂಟೆಯಾದ್ರೂ ಮನೆಗೆ ಹೋಗಲು ಬಿಡದ ಇವನ ಮೇಲೆ ಎಲ್ರೂ ಸಿಟ್ಟು ಮಾಡಿಕೊಂಡಿದ್ರು. ಆದ್ರೆ ಕಟ್ ಮಾಡಿದ್ದ ಪೇಪರ್ರು ಕಡ್ಡಿಗಳನ್ನ ಅಂಟಿಸಿ ರಾಮಣ್ಣ ಅದಕ್ಕೊಂದು ಮಂಟಪದ ರೂಪ ಕೊಟ್ಟಮೇಲೆ ಎಲ್ರಿಗೂ ಸೈಕು. ಆ ಮಂಟಪದಲ್ಲಿ ಎಡಕ್ಕೆ ಬಲಕ್ಕೆ ಮತ್ತೆ ಮೇಲೊಂದು ತೂತು ಬಿಟ್ಟಿದ್ದ. ಯಾಕೆ ಅಂತ ನಾನು ಕೇಳಿದಾಗ ಬೆಳಿಗ್ಗೆ ತೋರಿಸ್ತೀನಿ ಇರು ಅಂದ. ಮಾರನೇ ದಿನ ಗಣಪತಿ ತರುವ ವೇಳೆಗೆ ಆ ಮೂರೂ ತೂತುಗಳಿಂದ ಒಂದೊಂದು ಬಣ್ಣದ ಲೈಟ್ ಬಿಟ್ಟು ಹೆಂಗಿದೆ ಅಂದ. ನಾನಂತೂ ಅಷ್ಟು ಪ್ಯಾಶನ್ನಿಂದ ಮಾಡಿರೋ ಗಣಪತಿ ಮಂಟಪಾನ ಮತ್ತೆಲ್ಲೂ ನೋಡಿಲ್ಲ.

ಪೇಪರ್ ಕಟ್ಟಿಂಗ್ ವಿಷಯ ಬಂದಿದ್ರಿಂದ ಇನ್ನೊಂದು ನೆನಪು ತಲೆಗೆ ಬಂತು. ನಾನು ಇವಾಗ ರಾಮಣ್ಣನ ಬಗ್ಗೆ ಹೇಳ್ತಾ ಇರೋ ತರಾನೆ ರಾಮಣ್ಣ ನಮ್ಮ ಎರಡನೇ ಮಾವನ ಬಗ್ಗೆ ಅಭಿಮಾನದಿಂದ ಅವಾಗಾವಾಗ ಹೇಳ್ತಿದ್ದ. ಅವನಿಗೆ ಚೆಸ್ ಆಡೋದಕ್ಕೆ ಕಲಿಸಿದ್ದೂ ಮಂಜು ಮಾಮನೇ ಅಂತೆ. ನಮ್ಮ ಮನೆಯಲ್ಲಿ ಚೆಸ್ ಪಾನ್‌ಗಳು ಇದ್ವು. ಆದ್ರೆ ಬೋರ್ಡ್ ಏನಾಗಿತ್ತೋ ಏನ್ ಕತೇನೋ ಇರಲಿಲ್ಲ. ರಾಮಣ್ಣ ನನ್ನ ಒಂದು ಉದ್ದನೇ ನೋಟ್‌ಬುಕ್ ಮೇಲೆ ಡಿಸ್ ಡಿಸೈನಾಗಿ ಹೆಸರು ಬರೆದು ಕೊಟ್ಟಿದ್ದ. ಅದು ತುಂಬಿದೆಯಾ ಅಂತ ಕೇಳ್ದ. ಅದು ತುಂಬಿ ವರ್ಷದ ಮೇಲಾಗಿತ್ತು. ತಂದುಕೊಟ್ಟೆ. ನಡುವೆ ಇರೋ ಹಾಳೇನೆಲ್ಲ ಕಿತ್ತು ಬರೀ ರಟ್ಟು ಮಾತ್ರ ಉಳಿಸಿಕೊಂಡ. ಸ್ಕೇಲ್‌ನಲ್ಲಿ ಆ ರಟ್ಟಿನ ಅಳತೆ ತಗೊಂಡು ಏನೋ ಲೆಕ್ಕಾಚಾರ ಹಾಕಿ ಬಾಕ್ಸ್‌ಗಳನ್ನ ಬರೆದು ಅದಕ್ಕೆ ಕಪ್ಪುಬಿಳುಪಿನ ತರ ಕಾಣುವಂತೆ ಬಣ್ಣ ತುಂಬಿದ. ಸ್ವಲ್ಪ ಹೊತ್ತಿನಲ್ಲೇ ಅರವತ್ನಾಲ್ಕು ಮನೆಗಳ ಒಂದು DIY ಚೆಸ್ ಬೋರ್ಡ್ ರೆಡಿಯಾಯ್ತು. ಆ ಚೆಸ್ ಬೋರ್ಡಿನಲ್ಲಿ ಅವನ ಜೊತೆ ಎಷ್ಟು ಮ್ಯಾಚ್ ಆಡಿದ್ದೀನೋ ಲೆಕ್ಕ ಇಲ್ಲ. ಅವನೇ ಹೇಳಿಕೊಟ್ಟ ಟ್ರಿಕ್ಸ್‌ಗಳನ್ನ ಉಪಯೋಗಿಸಿಕೊಂಡು ಅವನನ್ನ ಸೋಲಿಸಿದಾಗ ರಾಮಣ್ಣ ಹೆಮ್ಮೆ ಪಡ್ತಿದ್ದ. 

ಆದ್ರೆ ನಾನು ಏಳನೇ ಕ್ಲಾಸ್ ಮುಗಿಸಿ ಮತ್ತೆ ನಮ್ಮೂರಿಗೆ ಬಂದಮೇಲೆ ರಾಮಣ್ಣನ ಸಂಪರ್ಕ ಕಟ್ಟಾಗಿ ಹೋಯ್ತು. ಅವಾಗಾವಾಗ ಅಜ್ಜಿ ಊರಿಗೆ ಹೋದಾಗ ಸಿಕ್ಕು ಮಾತಾಡಿಸ್ತಿದ್ದ ಅಷ್ಟೇ. ಆದ್ರೆ ಕಾಲ ಮುಂದುವರೆದಂತೆ ರಾಮಣ್ಣ ಅಷ್ಟು ಎನಿಗ್ಯ್ಮ್ಯಾಟಿಕ್ ಅನ್ಸಿದ್ದು ಯಾಕೋ ಬರೀ ನಾಸ್ಟೆಲ್ಜಿಯದ ಮಹಿಮೆ ಇರಬಹುದು ಅನ್ಸೋಕೆ ಶುರುವಾಗಿತ್ತು. ಯಾಕಂದ್ರೆ ಇತ್ತೀಚೆಗೆ ಮಾತಾಡಿಸುವಾಗ ಮುಂಚಿನ ತರ ಯಾವ್ದೇ ಮ್ಯಾಜಿಕಲ್ ಅಂಶ ಅವನಲ್ಲಿ ಕಾಣ್ತಾ ಇರಲಿಲ್ಲ. ಫೇಸ್ಬುಕ್ಕಲ್ಲಿ "ಭಕ್ತಿಯಿಂದ ಶೇರ್ ಮಾಡಿ ಒಳ್ಳೇದಾಗತ್ತೆ" ಅನ್ನೋ ಕ್ಯಾಪ್ಷನ್ ಇರೋ ಏಳು ಹೆಡೆಯ ನಾಗರ ಹಾವಿನ ಫೋಟೋಶಾಪ್ಡ್ ಇಮೇಜ್ ಶೇರ್ ಮಾಡ್ತಿದ್ದ. 

ನಾನು ಸಿನಿಮಾ ಗಿನಿಮಾ ಅನ್ಕೊಂಡು ಓಡಾಡ್ತಿರೋ ವಿಷಯಾನೆಲ್ಲ ಅವನತ್ರ ಹಂಚ್ಕೊಂಡಿದ್ರೆ ಖುಷಿ ಪಡ್ತಿದ್ದ ಅನ್ಸತ್ತೆ. ಆದ್ರೆ ಅದಕ್ಕೆ ಟೈಮ್ ಬರ್ಲೇ ಇಲ್ಲ. ಹೋದ ವರ್ಷ ಉಚ್ಚಂಗಿದುರ್ಗದ ಹತ್ರ ಬೈಕ್‌ನಲ್ಲಿ ಬಿದ್ದು ತೀರಿಕೊಂಡ ಅಂತ ಸುದ್ದಿ ಬಂತು. ನಾಲ್ಕೈದು ವರ್ಷದ ಇಬ್ಬರು ಮಕ್ಕಳನ್ನ ಬಿಟ್ಟು ಹೋಗಿದ್ದಾನೆ. ಆ ಊರಲ್ಲೇನೂ ಅಂತಹ ಕ್ರಾಂತಿಕಾರಿ ಬದಲಾವಣೆಗಳು ಆಗಿಲ್ಲ. ಅವನ ಮಕ್ಕಳಿಗೆ ಚೆಸ್ ಬೋರ್ಡ್ ಮಾಡಿಕೊಡೋ ಅಂತವ್ರು ಯಾರಾದ್ರೂ ಆ ಊರಲ್ಲಿದ್ದಾರ? ಗೊತ್ತಿಲ್ಲ.  

Problem with urban Kannada filmmakers

"ನಾನು ಇದನ್ನ ಯಾವತ್ತೂ ಕೇಳಿರ್ಲಿಲ್ಲ"

"I didn't ask for any of this"

ಇವೆರಡೂ ಲೈನ್ ಓದ್ರಿ. ಯಾವುದು ಒರಿಜಿನಲ್ ಯಾವುದು ಟ್ರಾನ್ಸ್ಲೇಷನ್ ಅನ್ಸತ್ತೆ ನಿಮಿಗೆ?

ಈಗ ತಾನೆ ನೋಡಿಕೊಂಡು ಬಂದ "ಸಪ್ತಸಾಗರದಾಚೆ ಎಲ್ಲೋ" ಸಿನಿಮಾದಲ್ಲಿ ಈ ಕನ್ನಡ ಡೈಲಾಗಿಗೆ ಈ ಸಬ್‌ಟೈಟಲ್ ಇತ್ತು. ಇಂಗ್ಲಿಷಲ್ಲಿ ಬರೆದು ಆಮೇಲೆ ಕನ್ನಡಕ್ಕೆ ಬದ್ಲಾಯಿಸಿದಾರೆ ಅಂತ ಯಾವನ್ ಬೇಕಾದರೂ ಹೇಳಬಹುದು. ಬರೀ ಇದೊಂದು ಸಿನಿಮಾ, ಇದೊಂದು ಡೈಲಾಗ್ ಅಂತಲ್ಲ. ಇತ್ತೀಚೆಗೆ ಬರುತ್ತಿರೋ ಹೊಸ ಪೀಳಿಗೆಯ ಕನ್ನಡ ಸಿನಿಮಾಗಳಲ್ಲಿ ಪ್ಯಾಟರ್ನೇ ಆಗಿ ಹೋಗಿರುವಂತಹ ವಿಷಯ ಇದು.

ಯಾಕ್ ಹಿಂಗಾಗ್ತಿದೆ? ಯಾಕಂದ್ರೆ ಹೆಚ್ಚುಕಮ್ಮಿ ಎಲ್ಲಾ ಅರ್ಬನ್ ಫಿಲ್ಮ್‌ಮೇಕರ್ಸ್‌ಗಳು ಯೋಚಿಸೋದು ಇಂಗ್ಲಿಷ್‌ನಲ್ಲಿ. ಬರೆಯೋದೂ ಕೂಡಾ ಇಂಗ್ಲಿಶ್ ಲಿಪಿಯಲ್ಲೇ. ಅದು ಕನ್ನಡ ಸಿನಿಮಾವಾಗಿ ತೆರೆ ಮೇಲೆ ಬಂದಾಗ ಈ ತರ ಅಧ್ವಾನ ಆಗಿರತ್ತೆ. ಅದಕ್ಕೇ ಕೆಜಿಎಫ್‌ನಲ್ಲಿ ಆವಮ್ಮ ಆತರ ರೋಬೋಟಿಕ್ ಕನ್ನಡ ಮಾತಾಡೋದು. ಇತ್ತೀಚಿಗೆ ಬಂದ "ಆಚಾರ್ ಅಂಡ್ ಕೋ" ಅಲ್ಲಂತೂ ಆ ಹುಡುಗಿ ತನ್ನ ತಂಗಿಗೆ ತಂಗಿ ಗಂಡ ಹೊಡೀತಿದ್ದಾನೆ ಅಂತ ಮದುವೆ ಮನೆಗೆ ಬಂದ ಜನಕ್ಕೆಲ್ಲ ಸಿಟ್ಟಿನಲ್ಲಿ ಕೂಗಬೇಕು. ಅದಕ್ಕೆ ಆ ಹುಡುಗಿ ಸಹಜವಾದ ಕನ್ನಡವಾಗಿದ್ದರೆ ಏನು ಹೇಳಬಹುದು ಅಂತ ಗೆಸ್ ಮಾಡಿ ನೋಡನ…

"ನೋಡಿ ಈ ವ್ಯಕ್ತಿ ನನ್ ತಂಗೀಗೆ ಹೊಡೀತಿದಾನೆ" ಅಂತಾಳೆ. ನಮ್ತಾಯಾಣೆಯಾಗ್ಲೂ ಯಾವನ್ ಗುರು ಹಿಂಗ್ ಕನ್ನಡ ಮಾತಾಡ್ತಾನೆ 😑

ಏನ್ ಮಹಾ ಆಯ್ತು ಬಿಡಲೋ ಇದ್ರಿಂದ ಅಂತ ನಿಮಿಗೆ ಅನ್ಸಿದ್ರೆ ಖಂಡಿತಾ ಸರ್ಫೇಸ್ ಲೆವೆಲ್ ಗ್ಲಿಚ್ ಅಲ್ಲ ಕಣ್ರಿ ಇದು. ಕನ್ನಡದಲ್ಲೇ ಸ್ಕ್ರಿಪ್ಟ್ ಬರೀಬೇಕು ಅಂತ ಹೇಳೋ ತರದ ರೋಷಾಭಿಮಾನದ ಪೋಸ್ಟಂತೂ ಅಲ್ವೇ ಅಲ್ಲ. ಕೆನ್ ಲೋಚ್ ಯಾರ್ಕ್‌ಷೈರ್ ಇಂಗ್ಲಿಷ್‌ನಲ್ಲಿ ಸಿನಿಮಾ ಮಾಡಿದಾಗ ಅವನಿಗೆ ಒಂದು ಪ್ರಶ್ನೆ ಕೇಳಿದ್ದರು. ಆ ಆ್ಯಕ್ಸೆಂಟ್ ಬಿಟ್ಟು ಸ್ಟಾಂಡರ್ಡ್ ಇಂಗ್ಲಿಷ್‌ನಲ್ಲಿ ಸಿನಿಮಾ ಮಾಡಬಹುದಿತ್ತಲ್ಲ ಅಂತ. ಅದಕ್ಕೆ ಕೆನ್ ಲೋಚ್ ಉತ್ತರ - "We will lose more than the accent" ಅಂತ. ಅಂದ್ರೆ ಜನರ ಹಾವಭಾವ, ಜೀವನಶೈಲಿ, ಅವರ ಇಡೀ ವ್ಯಕ್ತಿತ್ವವೇ ಅವರು ಮಾತಾಡುವ ಭಾಷೆಯ ಜೊತೆಗೆ ಬೆರೆತು ಹೋಗಿರುತ್ತೆ. ಪಾತ್ರಗಳು ಈ ತರ ಬುಕ್ಕಿಶ್ ಕನ್ನಡ ಮಾತಾಡ್ತಿವೆ ಅಂದ್ರೆ ಆ ಫಿಲ್ಮ್‌ಮೇಕರ್ ಆ ಪಾತ್ರಗಳ ಪ್ರಪಂಚಕ್ಕೆ ಇಳಿಯೋ ಪ್ರಯತ್ನಾನೇ ಮಾಡಿಲ್ಲ ಅಥವಾ ತಾನು ಬರೆಯುತ್ತಿರೋ ಪಾತ್ರಗಳಿಂದ ಒಂದೈವತ್ತು ಕಿಲೋಮೀಟರ್ ದೂರ ಇದಾನೆ ಅಂತ ಅರ್ಥ.

ಸುಮ್ಮನೆ ಈ ಡೈಲಾಗ್ ಕೇಳಿ, ಸೂರಿಯ ಜಂಗ್ಲಿ ಸಿನಿಮಾದ್ದು- "ದೇವ್ರೇ ನನ್ನ ಈ ಸ್ಟೇಜ್‌ವರ್ಗೂ ಬದುಕ್ಸ್‌ಬೇಡಪ್ಪ. ಒಂದ್ ನೈನ್ಟಿ ಕುಡ್ದು, ತಲೆಮಾಂಸ ತಿಂದು, ವೈಟ್ ರೈಸ್ ತಿಂತಿದ್ದಂಗೆ ಪಟ್ ಅಂತ ಕರ್ಕೊಂಬಿಡು.‌ ಮತ್ತಲ್ಲೇ ಹೋತಾ ಇರ್ಬೇಕು". ಸುಮ್ನೆ ಪಾಸಿಂಗ್ ಡೈಲಾಗ್ ಅನ್ಸಿದ್ರೂನು ಆ ಪಾತ್ರದ ಮತ್ತು ಬೆಂಗಳೂರಿನ ಕ್ಯಾರೆಕ್ಟರ್ರೇ ಐತೆ ಈ ಡೈಲಾಗಲ್ಲಿ. ಯಾರಾದ್ರು ಡೈಲಾಗ್ ರೈಟಿಂಗ್ ಕಲಿಬೇಕು ಅಂದ್ರೆ ಸೂರಿ ಸಿನಿಮಾ ನೋಡಬೇಕು.

ಇಷ್ಟೆಲ್ಲ ಯಾಕೆ ಬರೆದೆ ಅಂದ್ರೆ ಇಷ್ಟು ದೊಡ್ಡ ಕೋಣೆಯಲ್ಲಿರೋ ಆನೆ ಬಗ್ಗೆ ಯಾರಾದ್ರೂ ಮಾತಾಡ್ಲೇಬೇಕಲ್ವಾ? I mean somebody has to address the elephant in the room right?

ಯೀಮಾ ಸುಮಾಕ್- ಇಂಕಾ ರಾಜಕುಮಾರಿ

ದಕ್ಷಿಣ ಅಮೆರಿಕದ ಪೆರು ದೇಶದ ಆ್ಯಂಡಿಸ್ ಪರ್ವತ ಶ್ರೇಣಿಗಳ ಒಂದು ಸಣ್ಣ ಹಳ್ಳಿಯಲ್ಲಿ ಒಬ್ಬಳು ಚಿಕ್ಕ ಹುಡುಗಿ ಅವಳ ಪಾಡಿಗೆ ಅವಳು ಹಾಡಿಕೊಂಡಿದ್ದಳು. ಒಂದ್ಸಲ ಹೆಂಗೋ ಒಬ್ಬ ಸಿಟಿ ವ್ಯಕ್ತಿಯ ಕಣ್ಣಿಗೆ ಬಿದ್ದು ಅವನು ಬಾರಮ್ಮ ನಿನ್ನ್ ರೇಂಜ್ ಬೇರೇನೆ ಐತೆ ನಿನ್ನ ಎಲ್ಲಿಗ್ ಕರ್ಕೊಂಡ್ ಹೋಗ್ತೀನಿ ನೋಡು ಅಂತ ಪೆರುವಿನ ರಾಜಧಾನಿ ಲೀಮಾಗೆ ಕರೆದುಕೊಂಡು ಹೋಗಿ ಈಕೆಯ ಕೈಯಲ್ಲಿ ಹಾಡಿಸಲು ಶುರು ಮಾಡ್ತಾನೆ. ಅಲ್ಲಿಂದ ಶುರುವಾಗುವ ಈಕೆಯ ಮ್ಯೂಸಿಕ್ ಕರಿಯರ್ ಮುಂದೆ ಹಾಲಿವುಡ್ಡು, ಯೂರೋಪು, ಸೋವಿಯತ್ ಯೂನಿಯನ್‌ಗಳಲ್ಲೆಲ್ಲ ಹಾವಳಿ ಎಬ್ಬಿಸತ್ತೆ. ಲ್ಯಾಟಿನ್ ಅಮೆರಿಕದ ಇಂಡಿಯನ್ ಹುಡುಗಿ ಒಬ್ಬಳು ಉತ್ತರ ಅಮೆರಿಕದ ಬೆಸ್ಟ್ ಸೆಲ್ಲಿಂಗ್ ಚಾರ್ಟ್‌ಗಳನ್ನ ಕೆಡವಿ ಬಿಸಾಕೋದು ಏನ್ ಸಣ್ಣ ವಿಷಯ ಅಲ್ಲ.

ಇದನ್ನೆಲ್ಲ ಅವಳು ಮಾಡಿದ್ದು ಅವಳ ಊರಿನ ಜನಪದ ಹಾಡುಗಳ ಮೂಲಕಾನೆ. ಸಾಮಾನ್ಯ ಮನುಷ್ಯರಿಗಿಂತ ಎರಡುಪಟ್ಟು ವೋಕಲ್ ರೇಂಜ್ ಈಕೆಯ ದನಿಯಲ್ಲಿತ್ತು. ನಾಕೂವರೆ-ಐದು ಆಕ್ಟೇವ್ ತನಕಾನೂ ಅವಳ ಧ್ವನಿ ಹೋಗುತ್ತಿತ್ತು ಅಂತ ಹೇಳ್ತಾರೆ. ಇದೆಲ್ಲ ಟೆಕ್ನಿಕಲ್ ಟರ್ಮ್ ಯಾವನಿಗೂ ಅರ್ಥ ಆಗಲ್ಲ. ಆಕೆಯ ಹಾಡುಗಳನ್ನ ಕೇಳಿದ್ರೆ ಆಕೆ ಗಂಟಲನ್ನೇ ಒಂದು ಇನ್ಟ್ರುಮೆಂಟ್ ತರ ಬಳಸೋದು ಮಾತ್ರ ರಪ್ ಅಂತ ಮಕಕ್ಕೆ ಹೊಡಯತ್ತೆ. ಇಂತಾಕೆಯನ್ನ ಹಾಲಿವುಡ್ ಸುಮ್ಮನೆ ಬಿಡತ್ತಾ. ಆಲ್ಬಂ ಕವರ್ ಮೇಲಿನ ಇವಳ ಚಿತ್ರಗಳು ಮತ್ತು ಇವಳ ಧ್ವನಿಯಲ್ಲಿದ್ದ ಮಾದಕತೆ ಎಲ್ಲಾ ಸೇರಿಸಿ "ಎಕ್ಸಾಟಿಕಾ" ಅಂತ ಒಂದು ಹೊಸ ಜಾನರ್ರನ್ನೇ ಸೃಷ್ಟಿಸಲಾಯ್ತು. 

ಇವಾಗ ಝೀ ಕನ್ನಡದ ಸರಿಗಮಪದಲ್ಲಿ ಹಳ್ಳಿಯವರಿಗೆ ಪಂಚೆ ಹಾಕ್ಸಿ, ಸಾಬರ ಹುಡುಗಿಗೆ ಬುರ್ಖಾ ಹಾಕ್ಸಿ ಎನ್ಕ್ಯಾಶ್ ಮಾಡಿಕೊಳ್ತಾರಲ್ಲ ಅದೇ ತರ ಈಕೆಯ ಆಲ್ಬಂ ಕವರ್‌ಗಳೂ ಸೌತ್ ಅಮೆರಿಕಾದ ನೇಟಿವ್ ವೇಷಗಳಿಂದಾನೆ ತುಂಬಿದಾವೆ. ಇದರ ಜೊತೆಗೆ ಈಕೆ ಇಂಕಾ ಸಾಮ್ರಾಜ್ಯದ ಕೊನೆಯ ದೊರೆ ಅಟಾಹುಲ್ಪಾ ವಂಶದವಳು ಅಂತೆಲ್ಲಾ ದಂತಕತೆಗಳನ್ನ ಹಾಲಿವುಡ್ಡೇ ಸೃಷ್ಟಿಸಿ ಹರಿಯಬಿಟ್ಟಿತ್ತು. ಇಂತಾ ಯಾವ ಕತೆಗಳನ್ನೂ ಯೀಮಾ ಇದು ಸುಳ್ಳು ಗುರು ಅಂತ ಹೇಳೋಕೆ ಹೋಗಲಿಲ್ಲ. ಇಂತದನ್ನೆಲ್ಲ ಆಕೆ ಎಂಜಾಯ್ ಮಾಡ್ತಿದ್ದಳು. ಮೊನ್ಮೊನ್ನೆ ಸ್ಪಾಟಿಫೈ ಅಲ್ಲಿ ಈವಮ್ಮ ಸಿಕ್ಕಮೇಲೆ ಈಕೆಯ ಒಂದು ಹಾಡನ್ನ ಬಿಗ್ ಲೆಬೋಸ್ಕಿಯಲ್ಲಿ ಕೋಅನ್ ಬ್ರದರ್ಸ್ ಯೂಸ್ ಮಾಡಿದ್ದಾರೆ ಅಂತ ಕೇಳ್ತಾ ಕೇಳ್ತಾ ರಿಯಲೈಸ್ ಆಯ್ತು. ಪುರ್ಸೊತ್ ಸಿಕ್ರೆ ಕೇಳಿ ಮಜಾ ಇದಾವೆ ಹಾಡುಗಳು :)

ಪ್ಲೇಲಿಸ್ಟ್

ರೆಡ್ ಡೆಡ್ ರಿಡೆಂಪ್ಷನ್ 2

ಮನುಷ್ಯನ ಇತಿಹಾಸ ನೋಡಿದ್ರೆ ಗುಹೆಯಲ್ಲಿ ಇದ್ದಿಲಿಂದ ಚಿತ್ರ ಗೀಚೋದ್ರಿಂದ ಶುರುವಾಗಿ ಯಾವಾಗ್ಲೂ ಯಾವುದಾದ್ರೂ ಒಂದು ರೀತಿಯಿಂದ ಕತೆ ಹೇಳೋದಕ್ಕೆ ಪ್ರಯತ್ನ ಮಾಡ್ತಾನೇ ಇರೋದು ಕಾಣ್ಸತ್ತೆ. ಚಿತ್ರ, ಹಾಡು, ಆಮೇಲೆ ಬರವಣಿಗೆ, ಮತ್ತೆ ಕಳೆದ ನೂರಿಪ್ಪತ್ತು ವರ್ಷಗಳಿಂದ ಸಿನಿಮಾ.. ಹಿಂಗೆ ಹೊಸ ಹೊಸ ವಿಧಾನಗಳು ಸಿಕ್ಕಂಗೂ ಮನುಷ್ಯ ಅವೆಲ್ಲಾದನ್ನೂ ಉಪಯೋಗುಸ್ಕೊಂಡು ಕತೆ ಹೇಳ್ತಾನೆ ಇದಾನೆ. ಅದಕ್ಕೆ ಹೊಸ ಸೇರ್ಪಡೆ ವಿಡಿಯೋ ಗೇಮ್ಸ್. 

ನೀವ್ ನನ್ ತರ ಮೊನ್ ಮೊನ್ನೆಯವರೆಗೂ ವಿಡಿಯೋ ಗೇಮ್ಸ್‌ ಬಗ್ಗೆ ಗೊತ್ತೇ ಇಲ್ದಂಗ್ ಇರೋರಾಗಿದ್ರೆ ಇವ್ನ್ ಯಾವನ್ ಗುರು ಹೋಗಿ ಹೋಗಿ ವಿಡಿಯೋ ಗೇಮ್ಸ್‌ನ ಸಾಹಿತ್ಯಕ್ಕೆ-ಸಿನಿಮಾಕ್ಕೆ ಹೋಲಿಸ್ತಿದಾನೆ ಅಂತ ಅನ್ನಿಸಬಹುದು. ಆದ್ರೆ ಇವಾಗ ರೆಡ್ ಡೆಡ್ ರಿಡೆಂಪ್ಷನ್ 2 ಆಡಿ ಮುಗಿಸಿದ ಮೇಲೆ ನನಗೆ ಯಾವ ಡೌಟೂ ಉಳಿದಿಲ್ಲ‌- ವಿಡಿಯೋ ಗೇಮ್ ಸಿನಿಮಾ & ಸಾಹಿತ್ಯ ಎರಡಕ್ಕೂ ಮೀರಿದ ಸಾಧ್ಯತೆಗಳನ್ನ ಹೊಂದಿರೋ ಅಷ್ಟೇ ಪವರ್‌ಫುಲ್ ಆದ ಆರ್ಟ್ ಫಾರ್ಮ್.

ಒಂದೊಂದ್ ಆರ್ಟ್ ಫಾರ್ಮ್‌ಗೂ ಬೇರೆ ಮೀಡಿಯಂಗೆ ಸಾಧ್ಯವಿಲ್ಲದ ತನ್ನದೇ ಆದ ಎಕ್ಸ್‌ಕ್ಲೂಸಿವ್ ಅಂಶ ಇರತ್ತೆ. ಸಿನಿಮಾಕ್ಕೆ ಎಡಿಟಿಂಗ್ ಇದ್ಯಲ್ಲ ಹಂಗೆ. ಅದೇ ತರ ವಿಡಿಯೋ ಗೇಮಿಗೇ ಸ್ಪೆಸಿಫಿಕ್ಕಾಗಿರುವ ಅಂಶ ಅಂದ್ರೆ ಅದು ಕ್ರಿಯೇಟ್ ಮಾಡೋ ಓಪನ್ ವರ್ಲ್ಡ್. ಸಿನಿಮಾದಲ್ಲಿ ಫಿಲ್ಮ್ ಮೇಕರ್ ರೆಕಾರ್ಡ್ ಮಾಡಿಕೊಂಡು ಬಂದು ತೋರಿಸಿದ್ದು ಮಾತ್ರ ಆ ಕತೆಯ ಪ್ರಪಂಚ. ಆದ್ರೆ ವಿಡಿಯೋ ಗೇಮ್‌ನಲ್ಲಿ ಇಡೀ ಆ ಕತೆಯ ಪ್ರಪಂಚಾನ ಕ್ರಿಯೇಟ್ ಮಾಡಿ ನಿಮ್ಮನ್ನ ಒಂದು ಪಾತ್ರವಾಗಿ ಅದರೊಳಗೆ ಬಿಡ್ತಾರೆ. ನೀವು ಅದ್ರಲ್ಲಿ ಎಲ್ಲಿ ಬೇಕಾದರೂ ಓಡಾಡಬಹುದು. ಐವತ್ತು ವರ್ಷದ ಕೆಳಗೆ ಇದನ್ನ ಯಾರಿಗಾದ್ರೂ ಹೇಳಿದ್ರೆ ಸೈನ್ಸ್ ಫಿಕ್ಷನ್ ಅನ್ಕೊತಿದ್ರು. ಆದ್ರೆ ಟೆಕ್ನಾಲಜಿ ಯಾವ್ ಲೆವೆಲ್ಲಿಗೆ ಹೋಗಿದೆ ಅಂದ್ರೆ ವಿ ಆರ್ ಲಿವಿಂಗ್ ದಟ್ ಸೈನ್ಸ್ ಫಿಕ್ಷನ್ ನೌ. ವಾಟ್ ಎ ಟೈಂ ಟು ಬಿ ಅಲೈವ್ :)

1890ರ ಸುಮಾರಿನಲ್ಲಿ ಅಮೆರಿಕದ ವೈಲ್ಡ್ ವೆಸ್ಟ್‌ನಲ್ಲಿ ನಡೆಯೋ ಕತೆ ರೆಡ್ ಡೆಡ್ ರಿಡೆಂಪ್ಷನ್ 2. "ವೆಸ್ಟರ್ನ್" ಅನ್ನೋದು ಇವಾಗ ಒಂದ್ ಜಾನರ್ರೇ ಆಗೋಗಿದೆ ಅದ್ರ ಬಗ್ಗೆ ಇಲ್ಲಿ ಮತ್ತೆ ಇಂಟ್ರಡಕ್ಷನ್ ಬೇಕಾಗಿಲ್ಲ. ಇಲ್ಲಿ ನಮ್ಮ ಪ್ರೊಟಾಗನಿಸ್ಟ್ ಆರ್ಥರ್ ಮೋರ್ಗನ್ ಒಬ್ಬ Outlaw. ಬ್ಲ್ಯಾಕ್ ವಾಟರ್ ಅನ್ನೋ ಅವರ ಊರಿನಲ್ಲಿ ಇವರ ದರೋಡೆ ಪ್ಲಾನ್ ಯಡವಟ್ಟಾಗಿ ಪೊಲೀಸರು ಬೆನ್ನುಬಿದ್ದು ಊರು ಬಿಟ್ಟು ತಲೆತಪ್ಪಿಸಿಕೊಂಡು ಬಂದಿದ್ದಾನೆ. ಒಬ್ಬನೇ ಅಲ್ಲ- ತನ್ನ ಗ್ಯಾಂಗಿನೊಂದಿಗೆ. ಈ ಗ್ಯಾಂಗಿನಲ್ಲಿ ಹೆಂಗಸರಿದ್ದಾರೆ. ಮುದುಕರಿದ್ದಾರೆ. ಗಂಡ-ಹೆಂಡತಿಯರಿದ್ದಾರೆ. ಒಬ್ಬ ಸಣ್ಣ ಹುಡುಗನೂ ಇದ್ದಾನೆ.

ಊರು ಬಿಟ್ಟು ಬಂದ ಇವರ ತಲೆಮೇಲೆ ಇವಾಗ ಬೌಂಟಿ ಇದೆ. ಅಂದ್ರೆ ಹಿಡಿದುಕೊಟ್ಟವರಿಗೆ ಬಹುಮಾನ ಅಂತ. ಈಗ ಇವರ ಮುಂದಿರುವ ಮೊದಲನೇ ದಾರಿ ಪೋಲಿಸರ ಕೈಗೆ ಸಿಕ್ಕಿಕೊಳ್ಳದಿರುವುದು. ಎರಡನೆಯದು ಸ್ವಲ್ಪ ದುಡ್ಡು ಮಾಡಿಕೊಂಡು ದೇಶಾಂತರ ಹೋಗುವುದು. ದುಡ್ಡು ಮಾಡುವುದು ಅಂದ್ರೆ ಏನು ಕೂಲಿನಾಲಿ ಮಾಡಿ ಅಲ್ಲ. ದರೋಡೆ, ಕಳ್ಳತನ, ಮೋಸ etc. ಈ ನಡುವೆ ಇವರ ಜೀವನದಲ್ಲಿ ಏನೇನೆಲ್ಲ ಆಗತ್ತೆ ಅನ್ನೋದೇ ಕತೆ. ಈ ಗ್ಯಾಂಗಿನ ಜೊತೆಗಾರನಾಗಿ ಅವರ ಯೋಗಕ್ಷೇಮ ನೋಡಿಕೊಂಡು ಅವರ ಚಟುವಟಿಕೆಗಳಲ್ಲಿ ಭಾಗವಹಿಸುವುದು ಆರ್ಥರ್ ಮೋರ್ಗನ್ ಕೆಲಸ. ಅಂದ್ರೆ ಗೇಮ್ ಆಡೋರ್ ಕೆಲಸ.

ಬರೀ ಇಷ್ಟೇ ಆಗಿದ್ರೆ ಇದು ಆರ್ಟ್ ಆಗ್ತಿರಲಿಲ್ಲ. ಈ ಗ್ಯಾಂಗಿನ ಪ್ರತಿಯೊಂದು ಪಾತ್ರಕ್ಕೂ ವ್ಯಕ್ತಿತ್ವ ಇದೆ. ಅವರದ್ದೇ ಹಿನ್ನೆಲೆ ಇದೆ. ಅವರದ್ದೇ ಅಭಿಪ್ರಾಯಗಳಿವೆ. ಗೇಮ್ ಆಡ್ತಾ ಆಡ್ತಾ ಇವರನ್ನೆಲ್ಲ ಎಷ್ಟು ಹಚ್ಚಿಕೊಂಡುಬಿಡ್ತೀವಿ ಅಂದ್ರೆ ನೀವ್ ನಂಬಲ್ಲ. ಈ ಪಾತ್ರಗಳಿಗೆಲ್ಲ ವಾಯ್ಸ್ ಕೊಟ್ಟಿರೋ ನಟರು ಮತ್ತೆ ಆ ಪ್ರದೇಶದ ಆ ಕಾಲದ ಭಾಷೆಯನ್ನ ಯಾವ್ ಸಿನಿಮಾಕ್ಕೂ ಕಮ್ಮಿ ಇಲ್ಲದೇ ಅಥೆಂಟಿಕ್ಕಾಗಿ ತಂದಿರೋದಂತೂ ಸೂಪರ್.

ಇವರು ಕ್ರಿಯೇಟ್ ಮಾಡಿರೋ ಆ ವೈಲ್ಡ್ ವೆಸ್ಟ್ ವರ್ಲ್ಡ್‌ನ ನೀವು ಆಡೀನೇ ಸವಿಬೇಕು. ಸುಮ್ನೆ ಒಂದು ಮನೆಗೆ ನುಗ್ಗಿದ್ರೂ ಅಲ್ಲಿರೋ ತಟ್ಟೆಲೋಟ ಚಮಚಾನೂ ಆಗಿನ ಕಾಲದ್ದೇ ಆಗಿರತ್ತೆ. ದಾರಿಗುಂಟ ಕುದುರೆ ಮೇಲೆ ಹೋಗ್ತಿದ್ರೆ ಸಡನ್ನಾಗಿ ಯಾರೋ ಕಿರುಚ್ತಿರೋದು ಕೇಳತ್ತೆ. ನಿಮ್ಮ ಪಾಡಿಗೆ ನೀವು ಹೋಗಬಹುದು. ಆದ್ರೆ ಏನಿದು ಸದ್ದು ಅಂತ ನೀವು ಸದ್ದು ಬಂದ ದಿಕ್ಕಿನ ಕಡೆಗೆ ಹೋಗೋಕೆ ಡಿಸೈಡ್ ಮಾಡಿದ್ರೆ ಅಲ್ಲಿ ಯಾರೋ ಒಬ್ಬನಿಗೆ ತೋಳ ಅಟ್ಯಾಕ್ ಮಾಡ್ತಾ ಇರತ್ತೆ. ಅಥ್ವಾ ಯಾರೋ ಕಳ್ಳ ದರೋಡೆ ಮಾಡ್ತಾ ಇರ್ತಾನೆ. ಅಥ್ವಾ ಹಾವು ಕಚ್ಚಿರತ್ತೆ. ಅಥವಾ ಯಾರೋ ಹೆಂಗಸಿಗೆ ಕುದುರೆ ಕೈಕೊಟ್ಟು ಕಾಡಿನ ಮಧ್ಯ ಒಂಟಿಯಾಗಿರ್ತಾಳೆ. ನೀವು ಹೆಲ್ಪ್ ಮಾಡಬಹುದು ಅಥವಾ ನಿಮ್ಮ ಪಾಡಿಗೆ ನೀವು ಹೋಗಬಹುದು.

ವರ್ಲ್ಡ್ ಅಂದ್ರೆ ಬರೀ ಮನೆ, ಊರು ಕಾಡು ಅಷ್ಟೇ ಅಲ್ವಲ್ಲ. ಅಲ್ಲಿರೋ ಜನ. ಅಲ್ಲಿ ನಡಿಯೋ ಘಟನೆಗಳು. ಅವಾಗಿನ ರಾಜಕೀಯ ಸ್ಥಿತಿ ಇವೆಲ್ಲ ಕತೆ ನಡೆಯೋ ಕಾಲ ಮತ್ತೆ ಜಾಗಕ್ಕೆ ಸರಿಯಾಗಿರಬೇಕು. ಅದೆಲ್ಲ ಸೇರಿ "ವರ್ಲ್ಡ್" ಅಂತ ಆಗೋದು. ಉದಾಹರಣೆಗೆ ನಮ್ಮ ಗ್ಯಾಂಗ್ ಲೀಡರ್ ಪೋಲಿಸರನ್ನ ಎದುರು ಹಾಕಿಕೊಂಡು ಇವಾಗ ನೇಟಿವ್ ಇಂಡಿಯನ್ಸ್ ಜೊತೆಗೆ ಸೇರಿಕೊಂಡು ಪೋಲಿಸರ ಮೇಲೆ ದಾಳಿಗೆ ಇಳಿದಿದ್ದಾನೆ. ಆದ್ರೆ ಆರ್ಥರ್‌ಗೆ ಗೊತ್ತು ಇವನು ಇಂಡಿಯನ್ಸ್‌ಗೆ ಹೆಲ್ಪ್ ಮಾಡ್ತಿದೀನಿ ಅನ್ನೋದು ನಾಟಕ. ಇಂಡಿಯನ್ಸ್ ಮೇಲೆ ಪೋಲಿಸರ ಗಮನ ಹೋದರೆ ತಾನು ಬಚಾವಾಗೋದು ಸುಲಭ ಅನ್ನೋದು ಗ್ಯಾಂಗ್ ಲೀಡರ್ ಉದ್ದೇಶ ಅಂತ. ಈ ಕತೆಯ ಈ ಭಾಗ ಸಾವಿರ ರೀತಿಯಲ್ಲಿ ಇರಬಹುದಿತ್ತು. ಆದರೆ ಗೇಮ್ ಡೆವಲಪರ್ಸ್‌ ಇದನ್ನೇ ಆರಿಸಿಕೊಂಡಿದ್ದಕ್ಕೇ ಇದು ಆರ್ಟ್ ಅನ್ನಿಸಿಕೊಳ್ಳೋದು. ಯಾಕಂದರೆ ವರ್ಲ್ಡ್ ಅಂದರೆ ಬರೀ ಮನೆ, ಊರು, ಕಾಡು ಅಷ್ಟೇ ಅಲ್ಲ. ಅಲ್ಲಿನ ಇತಿಹಾಸ ಕೂಡಾ. ಈ ಕತೆಯನ್ನ ಸಿನಿಮಾನೂ ಮಾಡಬಹುದಿತ್ತು. ಕಾದಂಬರಿ ಮೂಲಕಾನೂ ಹೇಳಬಹುದಿತ್ತು. ಆದರೆ ವಿಡಿಯೋ ಗೇಮ್ ಆಗಿ ಇದು ಕೊಡುವ ಅನುಭವಾನ ಅವೆರಡೂ ಕೊಡೋದಕ್ಕೆ ಸಾಧ್ಯ ಆಗ್ತಿರಲಿಲ್ಲ. ಒಟ್ನಲ್ಲಿ RDR2 ಈಸ್ ಎ ಮಾಸ್ಟರ್‌ಪೀಸ್. ಆದ್ರೆ ಸಿನಿಮಾಕ್ಕೆ ಆಸ್ಕರ್, ಪುಸ್ತಕಕ್ಕೆ ಪುಲಿಟ್ಜರ್ ಸಿಗೋ ತರ ವಿಡಿಯೋ ಗೇಮ್ಸ್‌ಗೆ ಏನೂ ಸಿಗಲ್ಲ‌. ಅದೇನ್ ದರಿದ್ರ ಗೇಮ್ ಆಡ್ತಿಯ ಸಾಕು ಊಟ ಮಾಡು ಬಾ ಅನ್ನೋ ಅಮ್ಮನ ಬೈಗುಳ ಮಾತ್ರ :(

ಬ್ಯೂಟಿ ಆಫ್ ದ ಇಂಟರ್ನೆಟ್

ಯಾರು ಅಂತಾನೇ ಗೊತ್ತಿರಲ್ಲ. ಒಂದ್ಸಲಾನು ಮಾತಾಡ್ಸಿರಲ್ಲ. ಆದ್ರೆ ಇಂಟರ್ನೆಟ್ಟಲ್ಲಿ ಪ್ರಪಂಚದ ಯಾವ್ದೋ ಒಂದು ಮೂಲೇಲಿ ಕುತ್ಕೊಂಡಿರೋ ಯಾರೋ ಒಬ್ರು ನಮ್ಮ ಹಾರ್ಟ್‌ನ ಟಚ್ ಮಾಡಿಬಿಡ್ತಾರೆ. ನಿಮಗೆ ಕನೆಕ್ಟ್ ಆಗೋ ಮೀಮ್ ಮಾಡೋ ಮೂಲಕ ಇರಬಹುದು. ಇಲ್ಲಾ 'ಅಯ್ಯೋ ಇದೆಲ್ಲಾ ನನಿಗೂ ಅನ್ಸಿದ್ದೇ ಆದ್ರೆ ಇವ್ನು ಎಷ್ಟ್ ಚೆನಾಗ್ ಆರ್ಟಿಕ್ಯುಲೇಟ್ ಮಾಡ್ ಹೇಳ್ದ' ಅನ್ನೋದ್ರ ಮೂಲಕ ಇರಬಹುದು. ಇಲ್ಲಾ ವರ್ಷಾನುಗಟ್ಲೆ ಹುಡುಕಿದ್ರೂ ಸಬ್‌ಟೈಟಲ್ ಸಿಗದಿರೋ ಒಂದು ಸಿನಿಮಾ/ಟಿವಿ ಶೋಗೆ ತಾನೇ ಟ್ರಾನ್ಸ್ಲೇಟ್ ಮಾಡಿ ಎಲ್ಲಾರೂ ನೋಡ್ಲಿ ಅಂತ ಕೋಡೋದ್ರಿಂದ ಇರಬಹುದು. ಕೊನೇದು ಈ ಪೋಸ್ಟ್‌ನ ಫೋಕಸ್ ಇವಾಗ.

ಸಿನಿಮಾ ನೋಡೋ ಹುಚ್ಚು ಇರೋರೆಲ್ಲ ಅರ್ಜೆಂಟೀನಾದ "ವೈಲ್ಡ್ ಟೇಲ್ಸ್" ಸಿನಿಮಾನ ನೋಡೇ ನೋಡಿರ್ತಾರೆ. ನಾನೂ ಅದೇ ತರ ಈ ಸಿನಿಮಾ ನೋಡಿ ಡೈರೆಕ್ಟರ್ 'ಡೇಮಿಯನ್ ಝಿಫ್ರಾನ್' ಮೇಲೆ ಫುಲ್ ಲವ್ವಾಗಿ ಇವ್ನು ಏನೇನ್ ಮಾಡಿದಾನೆ ಎಲ್ಲಾ ನೋಡಬೇಕು ಅಂತ ಹೊರಟೆ. ಅವನ ಹಿಂದಿನ ಎರಡು ಸಿನಿಮಾ ಏನೋ ಸಿಕ್ವು. ಮಜಾ ಇದ್ವು ಅದು ಬೇರೆ. ಆದ್ರೆ ಎಲ್ಲೇ ಇವ್ನ್ ಬಗ್ಗೆ ಓದಿದ್ರೂ ಇವನ ಮೊದಲ ದಿನಗಳಲ್ಲಿ ಮಾಡಿದ್ದ ಟಿವಿ ಸೀರೀಸ್ "ಲಾಸ್ ಸಿಮ್ಯುಲಡೋರಸ್" ಬಗ್ಗೇನೆ ಮಾತು. 'ಮೋಸ್ಟ್ ಪಾಪುಲರ್ ಶೋ ಇನ್ ಅರ್ಜೆಂಟೀನಾ', 'ಬೆಸ್ಟ್ ವರ್ಕ್ ಆಫ್ ಹಿಮ್' 'ಅಮೇಝಿಂಗ್ ಶೋ' ಇತ್ಯಾದಿ. ರೆಡಿಟ್‌ನಲ್ಲಿ ಫ್ಯಾನ್ಸ್ ಡಿಸ್ಕಷನ್‌ಗಳು ಬೇರೆ. ಇದ್ಕಿಂತ ಟೆಂಪ್ಟೇಷನ್ ಬೇಕಾ? ಆದ್ರೆ ಸ್ಪ್ಯಾನಿಷ್ ಭಾಷೆಯ ಈ ಶೋಗೆ ಎಲ್ಲಿ ಹುಡುಕಿದ್ರೂ ಸಬ್‌ಟೈಟಲ್ ಸಿಗ್ತಿಲ್ಲ ನನ್ಮಗಂದು.

ಹಿಂಗೇ ಎರಡ್ ವರ್ಷ ಪಾಸಾಯ್ತು. ನಡುನಡುವೆ ಇದನ್ನ ಹುಡುಕೋದು ಇಂಗ್ಲಿಷ್ ಸಬ್‌ಟೈಟಲ್ ಸಿಗದೇ ನಿರಾಸೆ ಆಗೋದು ಆಗ್ತಾನೆ ಇತ್ತು. ಒಂದಿನ ಹಿಂಗೇ ಯೂಟೂಬಲ್ಲಿ ಇದರ ಎಲ್ಲಾ ಎಪಿಸೋಡುಗಳನ್ನ ಯಾರೋ ಒಬ್ರು ಅಪ್ಲೋಡ್ ಮಾಡಿರೋದು ಕಾಣಿಸ್ತು. ನೋಡಿದ್ರೆ ಎಲ್ಲಾದಕ್ಕೂ ಇಂಗ್ಲಿಷ್ ಸಬ್‌ಟೈಟಲ್ ಇದಾವೆ. ವಾ.. ಅವತ್ತು ಆಗಿದ್ದ ಖುಷಿ ಹಂಗಿಂಗಲ್ಲ. ಇದೇ ಖುಷಿ ಮ್ಯಾಟ್ರು ಆದ್ರೆ ಇದನ್ನ ಅಪ್ಲೋಡ್ ಮಾಡಿದ್ದರ ಹಿಂದಿನ ಕತೆ ಗೊತ್ತಾದಮೇಲಂತೂ ಹಾರ್ಟಿಗೇ ಕೈ ಹಾಕ್ದಂಗಾಯ್ತು.

ಏನಂದ್ರೆ ಇದನ್ನ ಅಪ್ಲೋಡ್ ಮಾಡಿದ್ದ ಹುಡುಗಿ ಈ ಶೋನ ಹುಚ್ಚು ಫ್ಯಾನ್‌‌. ಇದನ್ನ ಸ್ಪ್ಯಾನಿಷ್ ಭಾಷೆ ಬಾರದ ಬ್ರೆಜಿಲ್‌ನ ತನ್ನ ಬಾಯ್‌ಫ್ರೆಂಡ್‌ಗೆ ತೋರಿಸಲೇಬೇಕು ಅಂತ ಎಲ್ಲಾ ಇಪ್ಪತ್ನಾಕು ಎಪಿಸೋಡುಗಳಿಗೆ ಇಂಗ್ಲಿಷ್ ಸಬ್‌ಟೈಟಲ್ ಬರೆದು ಯೂಟೂಬಿಗೆ ಹಾಕಿದ್ದಾಳೆ. ನಾನು ಗಬಗಬ ಒಂದೇ ಗುಕ್ಕಿಗೆ ಈ ಶೋ ನೋಡಿ ಮುಗಿಸಿದಮೇಲೆ ಈ ಶೋ ಮೇಲೂ ಸಬ್‌ಟೈಟಲ್ ಬರೆದ ಆ ಹುಡುಗಿ ಮೇಲೂ ಒಟ್ಟಿಗೆ ಲವ್ ಆಯ್ತು. ಅವಳಿಗೆ ಬಾಯ್‌ಫ್ರೆಂಡ್ ಇರಲಿಲ್ಲ ಅಂದಿದ್ರೆ ಹೆಂಗಾದ್ರು ಮಾಡಿ ಅರ್ಜೆಂಟೀನಾ ತನಕ ಹೋಗಿ ಹೆಣ್ಣು ಕೇಳಬಹುದಿತ್ತು‌. I'm pretty sure I appreciate this show more than him :(

ಶೋ ಅಂತೂ ಸಕತ್ ಮಜವಾಗಿದೆ. ನಾಕು ಜನರ ತಂಡ. ಇವರ ಕೆಲಸ ಜನರ ಸಮಸ್ಯೆಗಳನ್ನ ಪರಿಹಾರ ಮಾಡೋದು. ಲಿಟರಲಿ ಎನಿ ಪ್ರಾಬ್ಲಂ. ಸಾಲ ಕೊಟ್ಟೋನು ಇನ್ನೆರಡ್ ದಿನದಲ್ಲಿ ತೀರಿಸಲಿಲ್ಲ ಅಂದ್ರೆ ಹೆಂಡತಿ ಮಕ್ಕಳನ್ನ ಸಾಯಿಸ್ತೀನಿ ಅಂತ ಬೆದರಿಕೆ ಹಾಕಿದ್ದರೆ ಇವರ ಸಹಾಯ ಬೇಕು. 

ಗಂಡನಿಗೆ ಬೇರೊಬ್ಬಳ ಮೇಲೆ ಪ್ರೀತಿ ಆಗಿಬಿಟ್ಟಿದೆ‌. ಆದರೆ ಹೆಂಡತಿಗೆ ಕೈ ಕೊಟ್ಟು ಹಾರ್ಟ್ ಬ್ರೇಕ್ ಮಾಡೋಕೆ ಇಷ್ಟ ಇಲ್ಲ. ಅವಳಾಗಿ ಅವಳೇ ತನ್ನನ್ನ ಬಿಡುವಂತೆ ಮಾಡಬೇಕು. ಇದಕ್ಕೂ ಇವರ ಸಹಾಯವೇ ಬೇಕು. 

ಒಬ್ಬ ತರಕಾರಿ-ಹಣ್ಣಿನ ವ್ಯಾಪಾರ ಮಾಡ್ತಿರೋ ಮುದುಕನ ಅಂಗಡಿ ಮುಂದೇನೆ ಇವಾಗ ಸೂಪರ್ ಮಾರ್ಕೆಟ್ ಕಟ್ಟೋಕೆ ತಯಾರಿ ನಡೆಸ್ತಾ ಇದಾರೆ. ಅದಾಗಿಬಿಟ್ಟರೆ ಮುದುಕನ ಹೊಟ್ಟೆ ಪಾಡಿಗೆ ಕಲ್ಲು ಬೀಳತ್ತೆ. ಇದನ್ನಂತೂ ಇವರು ಮಾತ್ರ ಬಗೆಹರಿಸಬಲ್ಲರು.

ಇಷ್ಟೆಲ್ಲ ಯಾಕ್ರಿ. ಅರ್ಜೆಂಟೀನಾ ಪ್ರೆಸಿಡೆಂಟಿಗೆ ಹೆಂಡತಿ ಜೊತೆ ಮಲಗಿದಾಗ ಸಾಮಾನು ಏಳಲ್ಲ‌. ಎರೆಕ್ಟೈಲ್ ಡಿಸ್‍ಫಂಕ್ಷನ್. ಇದರಿಂದಾಗೋ ಹತಾಷೆ ಅವನ ಆಡಳಿತದ ಮೇಲೂ ಪರಿಣಾಮ ಬೀರ‌್ತಿದೆ. ಇದನ್ನ ಕೂಡಾ ಇವರೇ ಬಗೆಹರಿಸೋದು‌..

ಮಜಾ ಇರೋದು ಇವನ್ನೆಲ್ಲ ಇವರು ಹೇಗೆ ಬಗೆಹರಿಸ್ತಾರೆ ಅನ್ನೋದ್ರಲ್ಲಿ. ಇವರು ರೌಡಿಗಳಲ್ಲ. ಯಾರನ್ನೂ ಹೆದರಿಸೋದಿಲ್ಲ. ಇವರದ್ದೇನಿದ್ರೂ ಸೈಕಲಾಜಿಕಲ್ ಆಟ. ನಾಕು ಜನರ ತಂಡ ಅಂತ ಹೇಳಿದ್ನಲ್ಲ ಅದರಲ್ಲಿ ಒಬ್ಬೊಬ್ಬರದೂ ಒಂದು ಕೆಲಸ. ಒಬ್ಬಂದು ಇನ್ವೆಸ್ಟಿಗೇಷನ್. ಇನ್ನೊಬ್ಬಂದು ಆಪರೇಶನ್‌ಗೆ ಬೇಕಾದ ಓಡಾಟ, ಟೆಕ್ನಾಲಜಿ, ಕಾಸ್ಟ್ಯೂಂ ಇತ್ಯಾದಿಗಳನ್ನ ಹೊಂದಿಸೋದು. ಮತ್ತೊಬ್ಬನದು ಪಾತ್ರದಾರಿ ಕೆಲಸ‌. ಉಳಿದವನದ್ದು ಪ್ಲಾನಿಂಗ್. ಇವರೆಲ್ಲ ಒಟ್ಟಾಗಿ 'ಸಿಚುವೇಷನ್‌ಗಳನ್ನ' ಸೃಷ್ಟಿಸಿ ಎದುರಾಳಿಗೆ ಗೊತ್ತೇ ಆಗ್ದಿರೋ ತರ ತಮಗೆ ಬೇಕಾದ ಕೆಲಸ ಮಾಡ್ಕೊತಾರೆ. ಅದಕ್ಕೇ ಶೋ ಹೆಸರು Los Simuladores. (The Simulators). ಅದಕ್ಕಿಂತ ಬೆಟರ್ ಟ್ರಾನ್ಸ್ಲೇಷನ್ ಅಂದ್ರೆ Pretenders. ಹೋಗ್ಲಿ ಕನ್ನಡದಲ್ಲಿ ಹೇಳಬೇಕಂದ್ರೆ 'ನಾಟಕ ಮಾಡೋರು'.

ಇನ್ನೊಂದು ಇಂಟ್ರೆಸ್ಟಿಂಗ್ ವಿಷಯ ಏನಂದ್ರೆ ಇದನ್ನ ಬರೆದು ನಿರ್ದೇಶಿಸಿದಾಗ ಡೇಮಿಯನ್ ಝಿಫ್ರಾನ್‌ಗೆ ಬರೇ ಇಪ್ಪತ್ತೈದು ವರ್ಷ ವಯಸ್ಸು. ಪ್ರತಿ ಎಪಿಸೋಡಲ್ಲೂ ಏನ್ ಬೇಕಾದ್ರೂ ಸಮಸ್ಯೆ ಇರಬಹುದಾದ್ರಿಂದ ಒಂದೊಂದು ಎಪಿಸೋಡೂ ಬೇರೇನೆ ಜಾನರ್. ಒಂದು ಕ್ರೈಮ್ ಥ್ರಿಲ್ಲರ್ ಆದ್ರೆ ಇನ್ನೊಂದು ಸೈನ್ಸ್ ಫಿಕ್ಷನ್ ತರದ್ದು. ಮತ್ತೊಂದು ಸೂಪರ್ ಹೀರೋದು. ಇನ್ನೊಂದು ಸೋಷಿಯಲ್ ಸೆಟೈರ್. ಹಿಂಗೇ ಆಟ ಆಡ್ಬಿಟ್ಟಿದಾನೆ ನನ್ಮಗ. ಸಾಮಾನ್ಯವಾಗಿ ಸೀರೀಸ್‌ಗಳನ್ನ ಹಲವಾರು ಜನ ಸೇರಿ ಬರೆಯೋದ್ರಿಂದ ಒಬ್ಬಂದೇ ಅಂತ ಪರ್ಸನಲ್ ಸ್ಟ್ಯಾಂಪ್ ಇರಲ್ಲ. ಆದ್ರೆ ಇಲ್ಲಿ ಇವನೇ ಎಲ್ಲಾ ಎಪಿಸೋಡುಗಳನ್ನ ಬರೆದು ನಿರ್ದೇಶಿಸಿರೋದ್ರಿಂದ ಇಡೀ ಶೋ ಮೇಲೆ ಇವನ ಸಿಗ್ನೇಚರ್ ಸಕತ್ತಾಗ್ ಮೂಡಿದೆ. ಅವನು ಯೂಸ್ ಮಾಡೋ ಮ್ಯೂಸಿಕ್, ತನ್ನ ಇಷ್ಟದ ಸಿನಿಮಾಗಳಿಗೆ ಟ್ರಿಬ್ಯೂಟ್ ಕೊಡೋ ರೀತಿ, ತನ್ನ ಫೇವರಿಟ್ ಟಾಪಿಕ್‌ಗಳಾದ ಹಿಸ್ಟರಿ, ಸೈನ್ಸ್, ವರ್ಲ್ಡ್ ಪಾಲಿಟಿಕ್ಸ್ ಇವೆಲ್ಲವನ್ನೂ ಕತೆಯೊಳಗೆ ತರೋ ರೀತಿ ಎಲ್ಲಾದ್ರಲ್ಲೂ ಅವನ ಮಾರ್ಕ್ ಇರತ್ತೆ. ಮತ್ತೆ ಅಷ್ಟು ಚಿಕ್ಕ ವಯಸ್ಸಿಗೆ ಅದೆಲ್ಲದನ್ನೂ ಮೆಚೂರ್ಡ್ ಆಗಿ ಹ್ಯಾಂಡಲ್ ಮಾಡಿರೋದಂತೂ ಸೂಪರ್‌.

ಆ ಹುಡುಗಿ ಅಷ್ಟು ಕಷ್ಟ ಪಟ್ಟು ಯಾಕೆ ಇದಕ್ಕೆ ಸಬ್‌ಟೈಟಲ್ ಬರೆದ್ಲು‌ ನಾನ್ಯಾಕೆ ಇಷ್ಟ್ ಬಿಲ್ಡಪ್‌ ಕೊಡ್ತಿದೀನಿ ಅಂತ ಇದನ್ನ ನೋಡಿದ್ರೆ ನಿಮಗೆ ಗೊತ್ತಾಗತ್ತೆ. ಕಾಪಿರೈಟ್ ಸಮಸ್ಯೆಯಿಂದ ಆ ಹುಡುಗಿ ಅಪ್ಲೋಡ್ ಮಾಡಿದ್ರಲ್ಲಿ ಕೆಲವು ಎಪಿಸೋಡುಗಳನ್ನ ಯೂಟೂಬ್‌ನವರು ಡಿಲಿಟ್ ಮಾಡಿದ್ರು. ಆ ವಿಡಿಯೋ ಕ್ವಾಲಿಟಿ ಕೂಡಾ ಅಷ್ಟೇನೂ ಚೆನ್ನಾಗಿಲ್ದೇ ಇದ್ದಿದ್ರಿಂದ ನಾನು ಸಜೆಸ್ಟ್ ಮಾಡಿದ ಯಾರೂ ನೋಡಿರ್ಲಿಲ್ಲ ಇದನ್ನ. ಅದಕ್ಕೇ ಇದ್ದಿದ್ರಲ್ಲಿ ಒಳ್ಳೇ ಕ್ವಾಲಿಟಿ ಹುಡುಕಿ ಅದಕ್ಕೆ ಮತ್ತೆ ಸಬ್‌ಟೈಟಲ್‌ಗಳನ್ನ ಪುನಃ ಸಿಂಕ್ ಮಾಡಿ ಒಂದ್ ಕಡೆ ಗುಡ್ಡೆ ಹಾಕಿದೀನಿ. ಪ್ಲೀಸ್ ಚೆಕಿಟ್ ಔಟ್ :)

Los Simuladores with subtitles- telegram link